Факт: Уоррен Баффеттнинг четлаб ўтиш мумкин бўлган етти хатоси

Ўз хатоларидан кўра бошқаларнинг хатоларидан хулоса чиқариш яхшироқ. Insider нашри миллиардер Уоррен Баффетт томонидан йўл қўйилган еттита хатога эътибор қаратди.

Жуда тез қарор қилиш

Миллиардер томонидан 2013 йилда Berkshire Hathaway акциядорларига йўлланган мактубда у Energy Future Holdings компаниясининг икки миллиард долларлик қарзини сотиб олганлиги ҳақида гапириб берган. Баффетт мазкур харидни амалга оширишда ўзининг узоқ йиллик ҳамкори Чарли Мангер билан маслаҳатлашмагани учун афсусланади.

Компания салоҳиятини ҳар томонлама баҳолаш керак

Баффетт инвестиция киритган компанияларнинг асосий қисми ўзини оқлаган. Бироқ муваффақиятсизликка учраган компаниялар ҳам бўлган. Миллиардер муваффақиятсизликда асосий сабаб сифатида компанияга ва бозор сегментига нотўғри баҳо беришни кўрсатади.

Рақобатчи излаш

Уоррен Баффетт ўзининг «энг дахшатли хатоси» сифатида Dexter Shoes’ни сотиб олаётганда рақобатчиларни ўрганмаганини айтади. Хорижлик рақобатчилар сабабли миллиардер томонидан компанияга киритилган 443 миллион доллар ҳавога учган.

Агар пул «яхши турган» бўлса, инвестиция учун сарфламаслик керак

Баффетт Dexter Shoes қарзларини 2014 йилда ўзининг асосий компанияси Berkshire Hathaway акциялар пакети эвазига сотиб олган. Dexter Shoes’нинг муваффақиятсизлиги сабабли миллиардер доимий ва яхши даромад келиб турган манбадан маҳрум бўлган.

Ўз-ўзидан ортиқча шубҳаланиш керак эмас

1998 йилда Berkshire Hathaway компанияси General Reinsurance Corporation’ни сотиб олган. Бироқ тезда Баффетт бу қарори нотўғри бўлган деб ўйлай бошлаган. Ташқи кузатувчилар ҳам Баффетт йирик хатога йўл қўйди, деб ҳисоблаган. Бироқ амалиёт кўрсатдики, хато компанияни сотиб олиш эмас, ўзидан шубҳалангани бўлган.

Сотиш вақти келганда, узоқ вақт иккиланиш керак эмас

2013 йилда Tesco’нинг акциялари Berkshire Hathaway’нинг энг йирик активлари бўлган. Бир йил ўтгач Баффеттнинг акциялар пакетидан супермаркетлар тармоғи жой олмаган. Баффетт компания акцияларини савдога чиқармаганлигини ўзининг хатоси, деб ҳисоблайди.

Бирор ишни қилишни кечиктириш керак эмас

Баффетт йўл қўйган хатолардан бири вақтлироқ сотиб олиши керак бўлган компанияни кечроқ сотиб олганидир. У Walmart’нинг муваффақиятларидан 1990 йилларда ҳайратланган, бироқ компанияни 2005 йилда сотиб олган.