Олий Мажлис Қонунчилик палатаси депутатлари жорий йилда тўртинчи бор жойлардаги ҳақиқий ҳолатни ўрганиш учун ҳудудларда фаолият олиб бормоқда. Бу ҳақда Қонунчилик палатаси ахборот хизмати хабар берди.
Бу сафар улар Қорақалпоғистон Республикасининг Беруний тумани, Андижон, Бухоро, Жиззах, Навоий, Наманган, Самарқанд, Сирдарё, Сурхондарё, Тошкент, Фарғона, Хоразм ва Қашқадарё вилоятларининг Қўрғонтепа, Вобкент, Пахтакор, Кармана, Янгиқўрғон, Каттақўрғон, Ховос, Шўрчи, Паркент, Ўзбекистон, Хива ва Қарши туманларидаги ҳақиқий ҳолатни ўрганмоқда.
Парламент аъзолари жойларда асосан бирламчи тиббиёт муассасалари, жумладан, қишлоқ врачлик пунктлари ва оилавий поликлиникалар фаолиятини таҳлил қилади.
Парламент қуйи палатаси ҳузурида Аҳолига тиббий хизмат кўрсатишни ва дори воситалари таъминотини янада яхшилаш, ушбу соҳадаги қонунчиликни амалиётга самарали татбиқ этишга кўмаклашиш борасидаги ишларни мувофиқлаштириш бўйича комиссия тузилган.
Комиссиянинг асосий мақсади мазкур тизимдаги ишларнинг жорий ҳолатини чуқур ўрганиш ва танқидий таҳлил қилиш, энг долзарб, ўз ечимини кутаётган муаммоларни аниқлаш, уларни ҳал этишга доир таклифлар ишлаб чиқиш ҳамда муайян чоралар кўришдан иборат.
Шу муносабат билан, турли касалликларнинг олдини олиш, бу жараёнда патронаж хизмати фаолиятини янада жадаллаштириш бўйича амалга оширилаётган ишларни ҳар тарфлама ўрганиш режалаштирилган.
Бундан ташқари, депутатлар тегишли туманлардаги фаолиятлари давомида аҳоли хонадонларига ташриф буюриб, яшаш шароитлари билан танишиш ҳамда уларни ўйлантираётган масалаларни аниқлаш ҳамда бартараф этиш мақсадида фуқаролар билан мулоқот ўтказади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)