GoEuro платформаси тезюрар поездлар тезлиги бўйича дунёдаги етакчи мамлакатлар рейтингини тузди. Рейтинг бу йўналишда Осиё мамлакатлари етакчилик қилаётганини кўрсатди.
Кучли учликка Япониянинг SCMaglev (603 км/соат), Франциянинг SNCF (575 км/соат), ва Хитойнинг Shanghai MagLev (501 км/соат) поездлари кирди.
Рўйхатга киритилган 20 мамлакатда юқори тезликдаги поездлар энг муҳим транспорт тармоқларидан бири ҳисобланади. Дастлаб Японияда йўлга қўйилган бўлса ҳам, юқори тезликдаги поездлар 1980—1990 йилларда Европада сезиларли даражада ривожланган. Яқин йилларда эса технологик тараққиёт Осиё мамлакатларининг юқори тезликдаги поездлар хизмат кўрсатадиган аҳоли сони, бир километр учун белгиланган нарх, ўртача ва юқори тезлик бўйича юқори ўринларга кўтарилишига туртки берди. Япония биринчи ўринга мустаҳкам жойлашиб, етакчилик қилмоқда.
Рейтингда 20 та мамлакатдаги юқори тезликда ҳаракатланувчи поездларнинг энг юқори ва ўртача ҳаракатланиш тезлиги, поезд ҳаракатланувчи йўналишнинг умумий тармоқдаги ҳиссаси, хизмат кўрсатиладиган аҳоли, бир километр учун белгиланган нарх ва рейтингдаги фоиз кўрсаткичи келтириб ўтилган.
Ўзбекистон рўйхатнинг 17-қаторидан жой олиб, Норвегия, АҚШ ва Финляндияни ортда қолдирди. Ўзбекистон аҳолисига хизмат кўрсатаётган юқори тезликдаги поездларнинг энг юқори тезлиги 255 км/соат ҳисобланади. Умумий темир йўл тармоғининг 8,21 фоизига, аҳолининг эса 9,01 фоизига юқори тезликдаги поездлар хизмат кўрсатади.
GoEuro’нинг юқори тезликда ҳаракатланувчи поездлар рейтинги
Платформа қурилаётган ва қурилиши режалаштирилган юқори тезликдаги поезд йўналишлари рейтингини ҳам тузган. Бу рейтингда ҳам Осиё мамлакатлари 51949 км билан етакчилик қилмоқда. Бу кўрсаткич бўйича Европа мамлакатлари 24603 км, Америка қитъаси мамлакатлари 4552 км, Африка 4280 км, Океания мамлакатлари 1749 км билан мос равишда кейинги ўринлардан жой олган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)