Ўзбекистон Республикаси Президенти Шавкат Мирзиёев «Прокуратура органларининг ижтимоий-иқтисодий ислоҳотлар ва мамлакатни модернизация қилиш, инсон ҳуқуқ ва эркинликлар ишончли ҳимоя қилинишини таъминлашдаги ролини кучайтириш тўғрисида»ги Фармонни имзолади. Бу ҳақда «Газета.uz» хабар бермоқда.
Фармонда прокуратура органларининг асосий вазифаси сифатида халқ манфаатлари учун хизмат қилиш белгиланди. Бунда қуйидаги йўналишлардаги вазифалар таъминланишига алоҳида эътибор қаратилиши кўзда тутилган:
- Ҳудудларни комплекс ривожлантириш дастурлари сўзсиз бажарилиши, ислоҳотларни амалга оширишга халақит бераётган тизимли нуқсонларни аниқлаш ва бартараф этиш;
- Тадбиркорлик фаолиятини ҳар томонлама қўллаб-қувватлаш, тадбиркорлик субъектлари ҳуқуқ ва манфаатларини ишончли ҳимоялаш;
- Аҳоли билан тўғридан тўғри ва очиқ мулоқот ўрнатилиши, фуқаролар мурожаатлари ўз вақтида кўриб чиқилиши ва ҳал этилиши;
- Профилактик тадбирларнинг, хусусан, вояга етмаганлар ва ёшлар ўртасидаги самарадорлиги, ҳуқуқбузарликлар содир этилиши сабабларини аниқлаш ва баратараф этиш;
- Кам таъминланган оилаларни манзилли ижтимоий ҳимоя қилиш, янги иш ўринлари яратиш дастурларининг амалга оширилиши, иш ҳақи, пенсия, стипендия ва нафақалар ўз вақтида тўланиши;
- Малакали тиббий ёрдам кўрсатилиши, дори-дармон воситаларининг аҳоли учун мақбуллиги, таълим жараёни сифати, таълим муассасаларидаги давомат;
- Фуқаролар, биринчи галда ёш оилалар ва етим болаларни арзон уй-жой, уй олиш кредит ресурслари билан таъминлаш, коммунал хизматлар кўрсатиш сифати ва ҳисоб-китобларнинг ўз вақтида амалга оширилиши;
- Табиий ресурслар, ер майдонларидан мақсадли ва самарали фойдаланиш.
Бош прокуратура таркибида Ижтимоий соҳада қонунчилик бажарилиши устидан назорат ва Иқтисодий соҳада қонунчилик бажарилиши устидан назорат бошқармалари ташкил этилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)