Олий суд раиси Тошкент вилоятидаги сайёр қабулда 50 га яқин мурожаатни кўриб чиқди

Ўзбекистон Республикаси Олий суди раиси Ш.Ғозиев Тошкент вилоятида сайёр қабул ўтказди. Бу ҳақда ЎзА хабар бермоқда.

Ўзбекистон Республикаси Президентининг Тошкент вилоятидаги Халқ қабулхонасида ташкил этилган сайёр қабулда вилоят ҳокимлиги вакиллари, вилоят жиноят, хўжалик, фуқаролик суди раислари ва судьялари, маҳаллалар раислари, тадбиркорлар, кенг жамоатчилик, ёшлар иштирок этди. 

Сайёр қабулда фуқаролар, тадбиркорлик субъектлари томонидан суд амалиёти билан боғлиқ масалаларда Ўзбекистон Республикаси Президентининг Виртуал қабулхонаси, Халқ қабулхоналари ва бевосита Олий судга қилинган мурожаатлари тингланди. 

Шахсий енгил автомашинамни бир танишимга ижарага берган эдим. У билан бу борада ижара шартномасини расмийлаштиргунимча орадан бир муддат вақт ўтиб кетди. Бу ишни ўз вақтида нотариал тасдиқлатмаганим, шахсий мулкимни ўзим яхши билмаган инсонга ишониб топширганим учун бугун афсус қилиб ўтирибман. Аниқроқ айтсам, ўша танишим мол ўғирлашда айбланди. Яқинда унинг бу қилмиши ўз исботини топди: жиноятга жазо муқаррарлиги таъминланди. Сайёр қабулга ўғирлик содир этилишида фойдаланилгани учун мусодара бўлган машинамни қайтариб олишим мумкинми, деган саволга жавоб олиш учун келдим. Бу муаммони қонуний тартибда кўриб чиқиш учун қайси идорага, қандай тартибда мурожаат қилишим лозимлигини тушунтириб берилди.

Мамадали Абдувалиев, фуқаро

«Дарё»нинг Telegram’даги расмий канали — @toshqindaryo’га аъзо бўлинг!