Ўзбекистон президенти Шавкат Мирзиёев 28 апрель куни «Тошкент давлат юридик университетида кадрлар тайёрлаш тизимини тубдан такомиллаштириш ва самарадорлигини ошириш чора-тадбирлари тўғрисида» қарор қабул қилди, деб ёзади «Газета.uz».
Ҳужжатга мувофиқ, Адлия вазирлиги тузилмасида адлия вазири ўринбосари — Тошкент давлат юридик университети (ТДЮУ) ректори лавозими жорий қилинди.
Университетда ўқув юкламасини қулайлаштириш кўзда тутилган, яъни мустақил тайёрланиш учун алоҳида даврни жорий этиш ва аттестация давомийлигини ошириш орқали назарий таълим вақти қисқартирилади.
Университет талабаларнинг академик мобиллигини таъминлаш мақсадида кредитларни (ўқув вақтининг шартли синов бирликлари)ни тўплаш ва ўтказиш тизимини жорий қилади.
ТДЮУ бакалавриатига талабаларни қабул қилиш квотаси оширилди. У 600 та ўрин даражасида белгиланди, қонунчиликка мувофиқ оширилган тўлов-шартнома асосида қўшимча қабул имконияти мавжуд.
Шунингдек, ТДЮУ бакалавриатига чет эл фуқароларини тест синовларисиз, суҳбат асосида қабул қилиш тартиби белгиланди, бунинг учун улар таълим тилини билиши керак.
Изоҳ (0)