Кубада радарлар экранидан йўқолган Ан-26 йўловчи самолёти ҳалокатга учради, дея хабар бермоқда «РИА Новости» Ciber Cuba порталига таяниб.
Нашр маълумотларига кўра, авиаҳалокат етиб бориш қийин бўлган олис жойда содир бўлган, бортдаги кишиларнинг ҳеч бири тирик қолмаган. Ҳалокат ҳақидаги маълумотни Ан-26 тегишли бўлган Aerogaviota авиакомпанияси тасдиқлади. Самолёт бўлаклари Лас-Ломас-де-Сан-Кристобаль туманида топилган.
NTN24 телеканали аввалроқ ғойиб бўлган лайнер бортида 39 киши бўлиши мумкинлиги ҳақида хабар берганди. Самолёт мамлакат шарқидаги Баракоа аэропортидан рейсни амалга ошираётган бўлган. Йўқолиб қолиш чоғида Ан-26 орол ғарбидаги Пинар-дель-Рио тумани осмонида бўлган.
Бутун дунё бўйлаб парвозларни кузатиб борувчи Flightradar24 веб-сервиси самолёт ҳалокати ҳақидаги маълумотни тасдиқлай олмади. «Биз ушбу рейс бўйича ахборотга эга эмасга ўхшаймиз», — дейилади сервиснинг Twitter’даги хабарида.
Ан-26 ҳарбий-транспорт самолёти Киев авиазаводида 1969—1986 йилларда ишлаб чиқарилган, жами 1,4 мингта нусха чиқарилган. Уларнинг бир қисми кейинчалик 43 йўловчини сиғдира оладиган Ан-26-100 йўловчи вариантига ўзгартирилган.
Изоҳ (0)