Исроил Кнессетининг спикери Амир Оҳана, Фаластин давлатини тан олишни истаган мамлакатлар уни Фаластин ҳудудида эмас, балки ўз пойтахтларида ташкил этишлари кераклигини билдирди. Бу баёнот Женевада Парламентлараро иттифоқ томонидан ташкил этилган парламент спикерларининг олтинчи жаҳон конференциясида янгради.
“Агар сиз Фаластин деб аталадиган давлатни хоҳласангиз, уни Лондонда, Парижда, ўз мамлакатларингизда барпо этинг”, деди Оҳана, бошқа мамлакатлардан келган ҳамкасбларидан “тарғиботни эмас, ҳақиқатни танлашни” сўраб.
Оҳана босиб олинган Фаластин ҳудудларидаги ҳарбий ҳаракатларни оқлаб, бошқа мамлакатларни “тарихнинг тўғри томонига ўтишга” даъват қилган.
“Баъзи Европа давлатлари тарафдори бўлган сохта тинчлик фақат янада каттароқ урушга олиб келади. Аммо биз олиб бораётган уруш ҳақиқий тинчликка эришиш учундир”, деди Исроил давлат арбоби.
Ушбу баёнот Европа давлатларининг Фаластинни тан олиш бўйича сўнгги ҳаракатларига жавобан берилди. 29 июль куни Буюк Британия бош вазири Кир Стармер, агар Исроил Ғазодаги инсонпарварлик блокадани тўхтатмаса ва тинчлик сари қадам ташламаса, Лондон сентябрь ойида Фаластин давлатини тан олиши мумкинлигини маълум қилди.
Франция аввалроқ Фаластин давлатини ҳеч қандай шартларсиз тан олишга ваъда берган эди, Малта ҳам унга эргашди. 2023 йил октябрь ойидан бери Норвегия, Ямайка, Испания, Ирландия, Арманистон, Багама ороллари, Словения, Барбадос ҳамда Тринидад ва Тобаго аллақачон Фаластинни тан олган.
Таъкидланишича, Оҳананинг нутқи пайтида Эрон, Яман ва Фаластин вакиллари норозилик билдирган ҳолда залдан чиқиб кетишган.
2023 йил октябрь ойидан бери Исроил босқинининг қурбонлари умумий сони 60 минг кишини ташкил этди. 146 минг киши жароҳат олган.
Изоҳ (0)