Албания парламенти спикери, Социалистик интеграция ҳаракати раҳбари Илир Мета 28 апрель, жума куни мамлакатнинг еттинчи президенти сифатида сайланди. Бу ҳақда ATA агентлигига таяниб, «РИА Новости» хабар берди.
Албания президенти парламент томонидан беш йил муддатга сайланади ва асосан рамзий вазифаларни бажаради. Президент овоз беришнинг тўртинчи доирасида, 140 та овоздан 87 та «ҳа» ва иккита «йўқ» жавобини олиб сайланди.
Албания президентлик сайлови тартибига кўра, овоз беришнинг биринчи уч доирасида номзод сайланиши учун депутатларнинг бешдан уч қисми (140 тадан 84 таси) овоз бериши керак. Сайловнинг тўртинчи ва бешинчи раундларида энг кўп овоз тўплаган номзод президент этиб сайланади. Албания конституцияси бўйича, депутатларнинг мамлакат раҳбарини сайлашга фақат бешта имконияти бор.
Янги президент номзоди бош вазир Эди Рама томонидан илгари сурилди.
Илир Мета бир неча йил олдин коррупцияда айбланган, бироқ маҳаллий суд уни оқлаган эди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)