АҚШда самолёт ҳавога кўтарилиши арафасида ҳожатхонага киргиси келиб қолган йўловчи рейсдан қолдирилди

Самолёт ҳавога кўтарилишидан олдин ҳожатхонага бориш зарурати Delta Airlines компанияси йўловчисининг рейсдан қолдирилишига сабаб бўлди. Бу ҳақда «ТАСС» хабар берди.

Ҳодиса 18 апрелда Атланта шаҳри аэропортида юз берган. Самолёт учиш йўлагида турган ва йўловчилар хавфсизлик камарларини таққан ҳолда ўз ўрнида ўтириши керак бўлган вақтда йўловчилардан бири — Ким Гамилтоннинг ҳожатхонага бориш зарурати туғилиб қолган. У рейсга кечикаётгани сабабли бу ишни аэропортда амалга ошира олмаган.

Йўловчининг сўзларига кўра, унинг ўз жойини тарк этишга эҳтиёж туғилган пайтда самолёт учишга навбат кутаётган эди. Гамилтон ўрнидан туриб, самолётнинг дум қисми томонга юрган. Ундан ўз ўрнига қайтиш талаб қилинган ва акс ҳолда самолёт навбатдаги ўз ўрнини йўқотиши айтилган. Бироқ эркак қисқа вақтга ҳожатхонага кириб чиққан. Экипаж эса шу вақтда йўловчини рейсдан тушириш учун ҳаво кемаси терминалга қайтаётганини эълон қилган.

Гамилтоннинг яқинида ўтирган оилавий жуфтликнинг айтишича, дастлаб парвозни кутиш бир неча дақиқа давом этиши эълон қилинган, бироқ самолёт ярим соат давомида ҳаракатланмаган. Бошқа йўловчилар ҳам Гамилтоннинг ҳаракатларини оқлашга ҳаракат қилган, бироқ шундай бўлса ҳам, у самолётни тарк этишга мажбур қилинган.

Авиакомпания ҳолат юзасидан кечирим сўрамаган ва йўловчи барча йўловчилар учун берилган кўрсатмани бажармагани айтилган.

«Дарё»нинг Telegram’даги расмий канали — @toshqindaryo’га аъзо бўлинг!