Апрель ойида EcoFlow Tech компанияси Indiegogo краудфандинг платформасида литий-ионли батареяларда ишлайдиган портатив аккумуляторни ишлаб чиқариш учун маблағ тўплаш кампаниясини ишга туширди, деб ёзади TJournal. Дастлаб мақсад 30 минг доллар тўплашдан иборат эди: уч ҳафтадан сўнг River учун маблағлар ундан ўн карра ошиб кетди.
River — кичик қаҳва тайёрлаш машинаси ҳажмига тенг дастакли пластик қути бўлиб, унинг ичида батареялар ва совитиш тизими жойлашган. Бу 116 А/соат сиғимли аккумулятор: унинг ёрдамида iPhone 7 Plus’ни нақ 40 марта қувватлантириш мумкин. Аммо кўплаб турли портлар шуни англатадики, оддий ташқи аккумуляторлардан фарқли ўлароқ, River нафақат USB-қурилмалар учун, балки бошқа кўплаб ускуналар учун ҳам тўғри келади.
River’да иккита USB порт, тезкор қувват учун иккита USB порт ва тезкор қувват учун яна иккита USB-C порт мавжуд. Бундан ташқари, қурилмада яна иккита розетка бор: уларга ноутбук ва ёритгичлардан тортиб, мусиқий овоз кучайтиргичлар ва қурилиш ускуналаригача бўлган қурилмаларни улаш мумкин.
Яна иккита порт автомобилдан ва электр тармоқдан қувват олиш учун мўлжалланган. Қурилманинг олд панелидаги таблода қувват қанча қолгани акс этади.
Беш килограмм оғирликдаги аккумуляторнинг ўзини электр тармоғи (тахминан 6 соат) ёки машинадан (9 соат) қувватлантириш мумкин. Генераторга қўшимча равишда 50 ваттли қуёш батареяларини сотиб олиш мумкин (249 долларга).
Қурилма етказиб бериш хизматини ҳисобга олмаганда 499 доллар туради. Уни АҚШ, Канада, Австралия, Буюк Британия ва Евроиттифоқ мамлакатларидан буюртма қилиш мумкин. Илк қурилмаларни июнь ойида етказиб бериш режалаштирилмоқда.
Изоҳ (0)