Ўзбекистон Республикаси Меҳнат вазири Азиз Абдуҳакимов Корея Республикасининг Ўзбекистондаги Фавқулодда ва Мухтор элчиси Квон Ён Уни қабул қилди, деб хабар берди «UzDaily».
Учрашувда Жанубий Корея Республикасида меҳнат фаолиятини амалга ошириш учун Ўзбекистон фуқароларини танлаб олиш механизмлари, бу соҳада томонлар ваколатларини аниқлаштириш, холислик, адолат ва ошкоралик принципларини таъминлашга йўналтирилган қўшимча чора-тадбирлар, шунингдек Ўзбекистондан меҳнат ресурслари учун квотани ошириш ва Кореяда ишлаш учун рухсат бериш жараёнини қисқартириш билан боғлиқ масалалар муҳокама қилинди.
Шунингдек, Абдуҳакимов меҳмонларни Меҳнат вазирлиги томонидан меҳнат миграциясини тартибга солиш бўйича ишлаб чиқилган норматив-ҳуқуқий ҳужжатлар билан ҳам таништирди. Бундан ташқари, меҳмонларга Россия, Япония ва Польшада вақтинчалик меҳнат фаолиятини амалга ошириш учун фуқароларни ташкилий танлаб олиш ва жалб этиш бўйича амалга оширилаётган чора-тадбирлар ҳақида ҳам маълумот берилди.
Шу ўринда Квон Ён У Меҳнат вазирлиги томонидан минтақавий квоталар бўйича меҳнат мигрантларини танлаб олиш механизми бўйича ишлаб чиқилган янги ташаббус ва таклифлар мантиқий, адолатли ва аниқ натижалар беришини таъкидлаб ўтди.
Томонлар Ўзбекистон ва Жанубий Кореянинг меҳнат миграцияси соҳасидаги ваколатли органлари ҳамкорлигини сифат жиҳатидан янги даражага олиб чиқишга келишиб олди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)