Виртуал қабулхонага келиб тушган мурожаатларнинг энг катта қисми — уй-жой ҳақидаги мурожаатлар

Ўзбекистон Республикаси Президенти Шавкат Мирзиёевнинг виртуал қабулхонасига келиб тушган мурожаатларнинг энг катта қисми — 79 666 таси уй-жой ҳақидаги мурожаатлардир. Бу ҳақда Facebook’даги Халқ билан мулоқот гуруҳига жойланган статистик маълумотда айтилади.

Виртуал қабулхонага келиб тушган мурожаатлар сони 24 апрель ҳолатига кўра соҳалар кесимида келтирилган. Шунингдек, мурожаатларнинг 40 354 таси ишга жойлашиш, 21 738 таси — судларда фуқаролик ишлари кўрилиши, 20 108 таси — оилага моддий ёрдам, 17 266 таси — алимент ундириш тўғрисидаги ижро ҳужжатлари масалаларига тааллуқли.

Виртуал қабулхонага мурожаатлар бўйича ўтказилган текширув ҳаракатлари устидан норози бўлиб келиб тушган мурожаатлар ҳам бор, уларнинг сони — 14 998 та. Бундан ташқари, меҳнат ва бандлик масалаларида — 14 091 та, фуқаролик паспорти масаласида — 12 179 та, болалар нафақаси бўйича — 10 954 та мурожаат юборилган. Мурожаатлар ичида энг кам тилга олинган мавзу эса судларда жиноят ишлари кўрилиши масаласидир. Бу борада келиб тушган мурожаатлар сони — 10 258 та.