Францияда 23 апрель куни президент сайловининг биринчи тури бўлиб ўтди. Унинг якунларига кўра, марказчи Эммануэль Макрон (23,75 фоиз овозни қўлга киритди) ва миллатчи Марин Ле Пен (21,53 фоиз) курашни давом эттирадиган бўлди. Социалтистик партия ва амалдаги президенти вакили Бенуа Амон атиги 6,35 фоиз овоз олди, номзоди «Республикачилар» томонидан илгари сурилган Франсуа Фийон 19,91 фоиз билан учинчи бўлди — ва иккинчи турга ўта олмади. Meduza нашри сайловнинг биринчи тури якунлари бўйича асосий маълумотларни бир саҳифага жамлади.
Сайловнинг биринчи тури нисбатан хотиржам ўтди. Сайловчиларнинг асосий қисми куннинг биринчи ярмида овоз берди — маҳаллий вақт билан 17:00 га келиб сайловчиларнинг 70 фоизи сайловда қатнашиб бўлган эди. Кун давомида шубҳали машиналар сабаб бир неча сайлов участкаси эвакуация қилинди, бироқ шубҳалар тасдиқланмади. Марин Ле Пен овоз берган сайлов участкасига унинг, Россия президенти Владимир Путин ва АҚШ президенти Дональд Трампнинг ниқобларини тақиб олган Фемен фаоллари бостириб кирган; улар полиция томонидан қўлга олинди.
Сайловнинг дастлабки натижалари эълон қилингани ҳамоноқ, Париж марказидаги Бастилия майдонида ҳам Ле Пен, ҳам марказчи Эммануэль Макронга қарши бўлган «антифашистлар ва антикапиталистлар» намойиши бошланган. Майдонга йиғилган 300 га яқин одам «Баррикадалар оқшоми»ни уюштиришга ваъда берган эди, бироқ орадан бир неча соат ўтиб полиция намойишчиларни тарқатиб юборди, уларнинг баъзилари қўлга олинди; икки киши жабрланди.
Сайлов натижалари сўнгги ижтимоий сўров натижалари билан деярли бир хил бўлди. Апрель ойи бошидан бери Макроннинг рейтинги 23—24 фоиз атрофида, Ле Пенники эса 22—23 фоиз атрофида эди. Айни вақтда, социалистлар вакили Бенуа Амоннинг мағлубияти кутилганидан-да каттароқ бўлди — сўровлар вақтида сайловчиларнинг 8 фоизи унга ишонч билдирган эди.
https://twitter.com/Place_Beauvau/status/856291447837949952
Мағлуб номзодлар «Миллий фронт»га қарши бирлашишга даъват этди. Сайлов якунига етиши ҳамоноқ социалист Бенуа Амон Марин Ле Пенга қарши чиқди, кейинроқ «республикачи» Фийон ҳам унинг ёнига қўшилди. Сўл кайфиятдаги «Бўйсунмас Франция» ҳаракати вакили Жан-Люк Меланшон (19,6 фоиз овоз олган) номзодларнинг бирортасини қўллаб-қувватлашдан бош тортиб, ўз тарафдорлари учун стратегияни белгилаб бериш мақсадида интернетда сўров ўтказишга ваъда берди. Франциянинг амалдаги президенти Франсуа Олланд Макронни ғалаба билан табриклади, бироқ иккинчи турда кимни қўллаб-қувватлаши ҳақида расман баёнот бермади. Ҳукумат раҳбари Бернар Казнёв эса, аксинча, дарҳол Макронни қўллашга даъват қилди.
Бир қатор муҳим масалалар бўйича Макрон ва Ле Пеннинг қарашлари кескин фарқ қилади. Ле Пен Шенген зонасидан чиқиш ва мамлакатнинг Европа Иттифоқига аъзолиги масаласида референдум ўтказиш, айни вақтда, қуролли кучлар қудратини ошириш тарафдори; буларнинг бари глобалист Макроннинг нуқтаи назарига зид. Ўз навбатида, Макрон иқтисодиётнинг алоҳида тармоқларида иш ҳафтасини узайтириш ва муҳожирлар учун бепул тиббий ёрдамни сақлаб қолишга чақирмоқда. Макрон энди парламентда ҳам кўпчилик ўринни қўлга киритиш ниятини билдирди, президент сайловининг биринчи туридаги ғалабасини эса мамлакат «сиёсий ҳаётидаги қиёфа ўзгариши» деб атади.
Франциядаги президент сайловининг иккинчи тури 7 май куни бўлиб ўтади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)