Арканзасда апрель охиригача саккиз киши қатл этилади. Сабаб — ўлим инъекциясининг яроқлилик муддати тугаяпти

Арканзасда 21 апрелга ўтар кечаси Лидел Ли қатл этилди, у 1990 йиллардаёқ қотилликда айбдор деб топилган эди. У бир аёлни уриб ўлдиргани учун судланган. Meduza’нинг ёзишича, Ли сўнгги сўздан воз кечган, сўнгги таом тановули ўрнига ибодат қилган. Унинг танасига учта препарат: ҳушини йўқотиши учун мидазолам, нафас олишини тўхтатиш учун векурония бромид ва юрак уришини тўхтатиш учун хлорид калий юборилди.

Лидел Ли Арканзасда 2005 йилдан бери қатл этилган илк маҳбус бўлди. Апрель ойи охиригача штат раҳбарияти жами саккиз қотилни ўлдирмоқчи. Бу қарор АҚШ Олий суди томонидан маъқуллаб бўлинган.

Арканзас штати раҳбарияти мидазолам препаратининг яроқлилик муддати тугаётгани сабабли ҳам қатлларни тезлаштиряпти. Натижада 10 йилдан бери бирорта ўлим жазоси ижро этилмаган штатда икки ҳафтада саккиз киши қатл этилади.

Мидазолам 2013 йилдан бери ўлим инъекциялари учун фойдаланилмоқда. Бу препаратни ишлаб чиқарувчилар эса йилдан йилга уни ҳукуматга ўлим инъекцияси сифатида сотишдан бош тортмоқда, чунки бу уларнинг нуфузига салбий таъсир кўрсатади.

2015 йили судланувчилар мидазоламнинг қўлланилишини суд орқали тақиқлашга уриниб кўрди, чунки бир йил аввал Оклахомадаги қатл вақтида препарат таъсир қилмай қолиб, маҳбус қийноқ азобида вафот этган эди. Арканзасдаги қатлларни кечиктиришга уриниши давомида судланувчиларнинг препаратдан фойдаланишни суд орқали тақиқлаш ҳаракати эса бесамар тугади.

Арканзасда қатл этилган Лидел Лининг адвокатлари биргина мидазоламнинг яроқлилик муддати тугаётгани сабабли ўлим жазоси ҳақидаги ҳукмларнинг ижро этилишини ноқонуний деб ҳисобламоқда. Уларнинг сўзларига кўра, агар шу баҳона бўлмаганида, улар янги ДНК-тестини ўтказиб, мижозининг айбсиз эканини исботлашга эришган бўларди.

«Арканзас маъмурияти қатллар қонун доирасида ижро этилаётганини таъкидламоқда. Арканзас бош прокурори Лесли Ратлиджнинг маълум қилишича, Лидел Ли томонидан ўлдирилган аёлнинг оиласи ва ниҳоят адолатнинг қарор топишига гувоҳ бўлди», — деб ёзади The New York Times.

«Дарё»нинг Telegram’даги расмий канали — @toshqindaryo’га аъзо бўлинг!