Пентагоннинг расмий вакили, ҳарбий-денгиз кучлари капитани Жефф Дэвис «Арабистон яриморолидаги Ал-Қоида» (АЯҚ) террорчилик тармоғига қарши курашиш мақсадида АҚШ қуролли кучларининг маълум миқдордаги контингенти Яманга жойлаштирилиши мумкинлигини маълум қилди. Бу ҳақда «ТАСС» хабар бермоқда.
«АҚШ ҳукумати Ямандаги АЯҚ ва бошқа экстремистик гуруҳлар фаолиятидан хавотирда. Шу боис ҳамда АҚШ фуқаролари манфаатларини ҳимоя қилиш мақсадида Яманнинг бир неча ҳудудида Америка кучларининг чекланган миқдордаги контингенти жойлаштирилиши мумкин», — деди Жефф Дэвис.
Унинг сўзларига кўра, Вашингтоннинг ушбу араб мамлакатидаги террорчиликка қарши стратегияси жангариларнинг хориждаги терактларни мувофиқлаштириш имконини йўққа чиқариш ҳамда ҳукуматга қарашли ҳудудларнинг АЯҚ вакиллари томонидан эгаллаб олинишига йўл қўймасликдир.
Пентагон вакили ўтган ой АҚШ томонидан Ямандаги радикалларга қарашли иншоотлар, буйруқ берилувчи марказлар ва таъминот линияларига 70 дан зиёд аниқ зарба берилганини маълум қилди. «Биз террорчиларга қарши операцияларни, шу жумладан, ҳаво операцияларини давом эттирамиз», — деди капитан.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)