«Каритас» католик хайрия ташкилотлари конфедерацияси маълумотларига кўра, ўтган йил давомида туристлар Римдаги машҳур Треви фавворасига умумий қиймати 1,4 миллион еврога тенг танга ташлаган, деб хабар берди «Коммерсантъ».
2013 йилда ушбу маблағ 100 минг еврога кам бўлган. 2014—2015 йиллар давомида фаввора таъмирланди. Қайта тиклаш ишларини Fendi модалар уйи молиялаштирган ва бу унга 2,2 миллон еврога тушган.
Треви фаввораси «ишлаб топаётган» барча пуллар анъанавий равишда дунёнинг 198 мамлакатидаги 154 миллий католик ташкилотларини бирлаштирувчи «Каритас»га топширилади. Ташкилот бу маблағларни камбағал оилаларни бепул озиқ-овқат билан таъминлашга, уйи йўқ инсонларга ошхоналар ва муҳожирлар учун бошпаналар очишга сарфлайди.
Фаввора 1762 йилда меъмор Николо Салви томонидан қурилган бўлиб, Римга ташриф буюрувчи бутун дунё сайёҳлари орасида жуда машҳур. Одамлар «фавворага орқа ўгириб, унга тангани ўнг қўл билан елкадан ошириб отсангиз, албатта яна бир бор Римга келасиз», деган иримга ишонади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)