Стокгольмдаги теракт муносабати билан гумонланувчи сифатида ҳибсга олинган Раҳмат Оқилов айбини тан олди. Бу ҳақда Оқиловнинг адвокати Юхан Эрикссон маълум қилди, дея хабар бермоқда Meduza.
«У террорчилик жиноятини содир этганлигини тан олди», — деди Эрикссон Стокгольм суди мажлисида қилган чиқиши чоғида. Мазкур мажлисда Оқиловга нисбатан эҳтиёт чораси белгиланади.
Тергов маълумотларига кўра, 39 ёшли Раҳмат Оқилов 7 апрель куни Стокгольм марказида пиёдалар устига босиб борган юк машинасини бошқарган. Ҳодиса оқибатида тўрт киши ҳалок бўлган, 15 киши жабрланган. Швеция ҳукумати юз берган воқеани теракт деб баҳолади.
Полициянинг маълум қилишича, Оқилов 2014 йили Швецияда доимий яшаш учун сўров берган, бироқ 2016 йилда унинг сўровига рад жавоби берилган ва у депортация қилиниши лозим эди. 2017 йил февралида у мамлакатдан чиқариб юбориш учун қидирувга берилган.
Стокгольмдаги теракт бўйича яна бир гумонланувчи ҳибсга олинган бўлиб, ҳозирча унинг исми ошкор этилмаяпти.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)