Озиш учун ҳапдориларнинг 5 та ёлғон ваъдаси

Сотувда оздирадиган кўплаб дори воситаларини учратиш мумкин. Гўёки, уларни қабул қилгач, метаболизм тезлашади, қад-қомат мукаммаллашади, тўқлик ҳисси юзага келади ва иштаҳа пасаяди.

Биринчидан, бундай даъволар учун ҳеч қандай илмий асослар йўқ. Бундан ташқари, агар озиш учун ҳапдорилар курсини қабул қилишга қарор қилсангиз, қуйидаги огоҳлантирувчи белгиларга эътибор беринг.

1-ваъда: «Парҳезсиз озинг!»

Қўшимчаларни ишлаб чиқарувчилар сизни ҳапдорини ичишингиз ёки баданингизга лосьон суришингиз билан, ёғ қатламлари ўз-ўзидан эриб кетишига ишонтирмоқчи бўлади. Афсуски, қатъий натижаларга эришиш учун сиздан кўпроқ куч талаб этилади. Одам ўз рационига ўзгартириш киритмасдан туриб, ҳеч қачон вазн йўқотмайди.

2-ваъда: «Машқ қилмасдан!»

Бундай оздирувчи қўшимчалар сиз томонингиздан ҳеч қандай жисмоний фаолликни талаб қилмаган ҳолда, сизни ортиқча килограммлардан халос этишга ваъда беради. Аммо парҳез каби, фитнессиз ҳам бўлмайди. Олимлар ҳали овқатланиш тартибини ўзгартирмасдан ва спорт билан шуғулланмасдан туриб, вазнни йўқотиш ҳолатларини қайд этмаган.

3-ваъда: «Метаболизм тезлашади»

Оздирувчи ҳапдорилар таркибига эфедра қўшила бошлаганидан сўнг, метаболизни тезлаштириш уларнинг сеҳрли хусусиятлари рўйхатига киритиладиган бўлди. 2004 йилда эфедра соғлиқ учун зарарли эканлигини ҳисобга олиб, уни қўллаш тақиқланди. Унинг ўрнини бошқа фаол ингредиентлар билан босишга интилишди, аммо уларнинг ҳеч бири барқарор натижаларни кафолатлай олмади.

4-ваъда: «Тўқлик ҳисси кучаяди»

Тўқлик ҳиссини қўшимчалар эмас, клетчатка, оқсил ва ёғлар кучайтиради. Масала шундаки, ўзингиз истаган натижаларга эришиш учун рационингизга ушбу масаллиқларни қандай қилиб кўпроқ киритишингиз мумкин? Оддий маслаҳатлар: нонуштага нон ва сарёғ ўрнига тухум (оқсил ва ёғлар) ва мева (клетчатка) енг. Ишда эса ёнғоқлар (оқсил, клетчатка, ёғлар)ни тамадди қилишингиз мумкин. Лосос (оқсил ва ёғлар) яшил сабзавотлар (клетчатка) ва тоблаб пиширилган картошка (клетчатка) кечки овқат чоғида сизни пиццадан камроқ тўйдирмайди.

5-ваъда: «Танангиз таркиби ўзгаради»

Баъзи қўшимчалар фойдали озуқа моддаларини қайта тақсимлаш ёки баъзи гормонларни йўқотиш йўли билан танангиз таркибини ўзгартиришни ваъда қилади. Назарий жиҳатдан, бу иш бериши мумкин, бироқ амалда бу даъвони жуда кам тадқиқотлар тасдиқлаган, бу тажрибалар эса фақат кемирувчилар устида ўтказилган.

Манба: «Wellness.com»