«Ўзбекнефтгаз» ва «ҚазМунайГаз» компаниялари нефтгаз соҳасида ҳамкорлик тўғрисида битим имзолади. «Газета.uz»нинг ёзишича, ҳужжат Ўзбекистон Президенти Шавкат Мирзиёевнинг Қозоғистонга давлат ташрифи доирасида, 23 март куни имзоланган.
«ҚазМунайГаз» сайтида ёзилишича, компаниялар Россия нефтини Ўзбекистонга транзит қилиш бўйича келишувга эришган.
Ўзбекистон нефтни қайта ишлаш саноатини модернизация қилиш лойиҳалари доирасида «ҚазТрансОйл»нинг нефть қувурлари тизимини Ўзбекистон йўналиши бўйлаб реконструкция қилиш ва кенгайтириш имкониятлари ўрганиб чиқилади.
«ҚазМунайГаз» Ўзбекистондаги мавжуд нефтни қайта ишлаш завод (НҚЗ)ларини модернизация қилиш лойиҳалари бўйича «Ўзбекнефтгаз»га техник кўмак кўрсатади ва мамлакатда янги НҚЗ қуришда техник кўмак кўрсатиш имкониятларини кўриб чиқади.
Остонада, шунингдек, «Ўзбекнефтгаз» ва Қозоғистон Энергетика вазирлиги ўртасида нефтгаз саноати соҳасидаги ҳамкорлик бўйича ўзаро англашув тўғрисидаги меморандум ҳам имзоланган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)