Тошкент шаҳрининг Қорақамиш даҳасида 70 ёшли аёл носоз лифтда 5 соат қолиб кетди (фото)

Тошкент шаҳрининг Олмазор тумани, Қорақамиш даҳасидаги 9-қаватли уйлардан бирида 70 ёшли аёл носоз лифтда 5 соат қолиб кетди. Бу ҳақда «Nuz.uz» хабар бермоқда.

25 март, шанба куни тушга яқин нафақадаги аёл бозордан уйига қайтиб, лифтга чиқди. 9-қават тугмасини босди, бироқ орадан бир неча сония ўтиб қурилма тўхтаб қолди. Аёл қўшнисига қўнғироқ қилди ва бу унинг жонига оро кирди.

Қўшни аёлга кўра, у дарров уй-жой мулкдорлари ширкати раиси билан боғланган, бироқ раис шаҳардан ташқарида эканлиги ва ёрдам беролмаслиги маълум бўлди. Шундан сўнг лифтларни таъмирлайдиган устага қўнғироқ қилади, бироқ у бошқа объектда эканлиги ва фақат кечки пайт бўшашини билдиради.

Шундан сўнг 1055 қисқа рақами орқали коммунал диспетчерлик хизмати билан боғланади. Бу ерда буюртма қабул қилиниб, ёрдам бериш ваъда қилинади. Бироқ орадан бир соат ўтиб ҳам, икки соат ўтгандан кейин ҳам ёрдам келмади. Кекса аёл лифтда қолаётганига салкам 4 соатга яқинлашганда эса навбатдаги қўнғироққа жавобан диспетчерлик хизмати оператори агар тезкор ёрдам зарур бўлса, қутқарув хизматига мурожаат этишни «маслаҳат» беради.

Қўшнилар иложсизликдан 1050 рақами орқали Тошкент шаҳар ҳокимлиги қошидаги қутқарув хизматига қўнғироқ қилади. Орадан ярим соат ўтиб қутқарувчилар етиб келди ва аёлни чиқариб олиш бўйича операцияни бошлади.

Махсус анжомлар ёрдамида иккинчи ва учинчи қават ўртасида тўхтаб қолган лифт эшигини очиш ва аёлни чиқариб олишга муваффақ бўлинди. Деярли 5 соат давомида қамалиб қолган аёл кўзида ёш билан қутқарувчиларга миннатдорлик билдирди.

Қутқарув хизмати ходимларининг айтишларича, бу коммуналчилар ўрнига уларнинг вазифасини бажаришга тўғри келаётган биринчи ҳолат эмас.

«Вақти-вақти билан хизмат доирамизга кирмайдиган чақириқларга ҳам боришимизга тўғри келади. Одатда авариялар, йўл-транспорт ҳодисалари, ёнғинлар ва бошқа фавқулодда ҳолатларга юз берганда ишга киришамиз. Бироқ кекса инсон лифтда бир неча соат қолиб кетганини айтишганда, бунга бефарқ қараб туролмадик», — дея таъкидлади қутқарувчилардан бири.

Маҳаллий аҳоли 1055 хизмати ҳеч қачон чинакамига ёрдам бермаганидан шикоят қилмоқда. Буюртмалар қабул қилинади, қаергадир етказилади, бироқ муаммо ҳал этилмай қолиб кетади, Қорақамиш даҳасида юз берган аянчли ҳолат каби. «Дарё»нинг Telegram’даги расмий канали — @toshqindaryo’га аъзо бўлинг!