Тошкентнинг Кичик ҳалқа йўли ва Фарғона йўли кўчаси туташган жойдаги йўл ўтказгич қайрилма шаклга эга бўлади, дея хабар бермоқда «Газета.uz» «Ўзбекистон» телеканалининг «Ахборот» дастурига таяниб.
«Фуқаролар томонидан Ўзбекистон Республикаси Президентининг халқ қабулхонасига келиб тушган кўп сонли сўровлар ва мурожаатларга кўра, мамлакат раҳбари объектни қайта тиклашга қарор қилди», — дейилади дастурда.
«Бу йўл катта қулайликларни яратади ҳамда ёндош йўллар — Истиқбол ва Сарикул кўчаларидаги йўл ҳаракатини енгиллатади, туман аҳолиси учун катта қулайликларни юзага келтиради», — деди «Ўзбекистон темир йўллари» АЖ ҳузиридаги «Боштранслойиҳа» компанияси бош директори Рустам Рўзиев.
«Вазифамиз турар-жой даҳасини сақлаб қолишдан иборат эди, шу туфайли ушбу массивни айланиб ўтадиган муҳандислик ечими қабул қилинди, бу эса замонавий технологик ечимларни талаб қилади. Шавкат Миромонович ушбу объектнинг муҳимлигини, унинг аҳоли учун зарурлигини таъкидлади, чунки бу лойиҳа шаҳар марказини шаҳар чеккаси билан тўғри йўл орқали бирлаштиради. Шу сабабли давлат раҳбари мазкур лойиҳани такомиллаштириш ва қурилиш муддатларини тезлаштириш бўйича аниқ топшириқлар берди. Яқин ойларда бу объектни қурамиз ва шаҳар аҳолиси фойдаланиши учун топширамиз», — деди Рустам Рўзиев.
Эслатиб ўтамиз, Миробод туманидаги бу кўприкнинг эни 30, узунлиги 346 метр бўлган қисми реконструкция қилинади, эни 22, узунлиги 281 метр бўлган қисми эса янгидан қурилади.
Изоҳ (0)