Наманган вилоят соғлиқни сақлаш бошқармаси бошлиғи Солижон Мўминов бошчилигидаги тиббиёт, фармацевтика ва тадбиркорлик тузилмалари вакилларидан иборат делегация Ҳиндистонда бўлиб қайтди. Бу ҳақда «Namnews.uz» хабар бермоқда.
Делегация аъзолари MJ Group компаниясининг Пуна ва Таложа шаҳарларидаги фармацевтика заводлари фаолияти билан танишди.
Солижон Мўминов ва MJ Group раҳбари Жашвантлаъл Шоҳ ўртасида музокаралар ўтказилди ва ўзаро ҳамкорлик тўғрисида меморандум имзоланди.
«Камол мед фарм» корхонаси раҳбари Абдуманноп Холмирзаев MJ Group раҳбарияти билан йил охирига қадар инбал усулида инсулин ва бошқа препаратларни ишлаб чиқариш йўлга қўйиш бўйича меморандум имзолади.
Ҳиндистон томони фармацевтика заводи қуриш учун 10 миллион АҚШ доллари миқдорида инвестиция киритилишини маълум қилди.
Jaypee hospitals ва Fortis Healthcare вакиллари билан Чуст туманида жойлашган тиббий ташхис марказига замонавий тиббий асбоб-ускуналар етказиш ҳақида келишиб олинди.
«Ифода агро кимё» корхонаси ва MJ Biofarm компанияси ўртасида ўсимликларни турли касалликлардан ҳимоялаш воситалари — кимёвий дорилар ишлаб чиқариш ва келгусидаги ҳамкорлик бўйича меморандум имзоланди.
Кимёвий дорилар ишлаб чиқариш бўйича дунёнинг етакчи еттиталигига кирган Biostadt Group томонидан ҳам Ўзбекистонга инвестиция киритиш истаги билдирилди.
Ченнай тиббиёт билим юрти вакиллари билан музокаралар давомида ўқув юрти мутахассисларининг Ўзбекистонда турли мураккаб операцияларда иштирок этиши, ўзбекистонлик мутахассисларнинг Ченнайда малака ошириши ҳақида меморандум имзоланди.
Ўзбекистондан тажриба алмашиш ва малака ошириш учун келадиган мутахассислар клиника ҳисобидан бепул ўқитилиши кафолатланди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)