Америка давлатлари ташкилотига (АДТ) кирувчи 14 мамлакат ҳукуматлари Венесуэланинг тузилмадаги аъзолигини тўхтатиб қўйиш ҳақидаги таклифни мавриди эмас, деб ҳисобламоқда.Бу ҳақда Аргентина ташқи ишлар вазирлиги томонидан эълон қилинган қўшма баёнотда маълум қилинди, дея хабар беради «ТАСС».
«Биз АДТ бош котиби Луис Альмагронинг Венесуэла бўйича ҳисоботини олдик. Уни ташкилот ичида ҳаракатлар режасини келишиб олиш учун синчиклаб ўрганиб чиқамиз. Шундай бўлса-да, давлатнинг тузилмадаги аъзолигини тўхтатиб қўйишни охирги чора деб ҳисоблаймиз. Бундай қарор қабул қилишдан аввал барча дипломатик уринишлар самарасиз якунланган бўлиши лозим», — дейилади баёнотда.
Ҳужжатда Аргентина, Бразилия, Канада, Чили, Колумбия, Коста-Рика, АҚШ, Гватемала, Гондурас, Мексика, Панама, Парагвай, Перу ва Уругвай ҳукуматлари «қардош Венесуэла бошидан ўтказаётган вазиятдан чуқур ташвишда» эканлиги билдирилган.
Улар мамлакат расмийларини сиёсий маҳбусларни озод этиш, Миллий ассамблея қарорлари қонуний эканлигини тан олиш, сайловлар ўтказиш муддатини белгилашга чақирди.
АДТ бош котиби Луис Альмагро ўтган ҳафтада мамлакатда қисқа муддатда ялпи сайловлар ўтказилмаса, Венесуэланинг ташкилотдаги аъзолигини тўхтатишни таклиф қилганди.
Изоҳ (0)