Америкалик сценарийнавис Гэри Голдмен маллифлик ҳуқуқини бузганлик ва «Ҳайвонлар шаҳри» мультфильми ғоясини ўғирлаганликда айблаб, Disney компаниясини судга берди. Бу ҳақда TJournal хабар бермоқда.
Голдменга кўра, у 2000 ва 2009 йилларда Disney продюсерларига ўзининг бир неча ғояларини таклиф этган, бироқ улар рад этилганди. Шундан сўнг эса компания «Ҳайвонлар шаҳри»ни яратиш чоғида қаҳрамонларининг аксари, мавзу, ҳатто картина номигача ундан ўзлаштирган.
Сценарийнавис товон тўланиши (суммаси ошкор этилмаган) ва муаллифлик ҳуқуқлари эътироф этилишини талаб қилди.
Disney вакиллари барча гумонларни «асоссиз» дея рад этди ва Голдменни ўзганинг шон-шуҳратига даъвогарликда айблади.
Эслатиб ўтамиз, «Ҳайвонлар шаҳри» мультфильми 2017 йилда «Оскар» мукофотининг энг яхши анимацион фильми номинациясида ғолиб чиқди.
Изоҳ (0)