Халқ депутатлари Қува туман кенгашининг навбатдаги сессиясида Олий Мажлис Қонунчилик палатаси депутатлар гуруҳининг ўрганиш натижалари, ижтимоий-иқтисодий соҳалардаги мавжуд вазият танқидий-таҳлилий кўриб чиқилди. Бу ҳақда палата матбуот хизмати хабар бермоқда.
Ишчи гуруҳ хонадонларда, кўпгина ижтимоий объектлар ва маиший хизмат кўрсатиш ташкилотларида бўлиб, одамларни ўйлантираётган муаммоларни, уларнинг талаб ҳамда истакларини яқиндан ўрганди. Ўрганиш ва мулоқотлар давомида аҳоли томонидан кўтарилган масалаларнинг 283 таси тегишли мутасадди ташкилот ва туман ҳокимлиги ёрдамида жойида ҳал этилди.
Депутатлар томонидан асосий эътибор туман аҳолисига кўрсатилаётган тиббий хизмат сифати, дори воситалари билан таъминланиш даражаси, ушбу соҳадаги қонунчиликни ҳаётга татбиқ қилиш борасида амалга оширилаётган ишларга қаратилди.
Тумандаги 18 та ҚВП таъмирталаб аҳволда экани, баъзи муассасаларда тоза ичимлик суви ҳамда электр таъминотидаги узилишлар аҳолига тиббий хизмат кўрсатиш сифатига салбий таъсир кўрсатаётгани маълум бўлди.
Шунингдек, депутатлар аҳолини патронаж хизмати билан қамраб олиниши, тиббиёт масканларининг малакали кадрларга бўлган эҳтиёжи, лаборатория-ташҳис жиҳозларининг бугунги кун талабларига жавоб бериши каби масалаларга эътибор қаратди.
Сессияда туманини ижтимоий-иқтисодий жиҳатдан ривожлантириш, аҳоли турмуш фаровонлигини янада яхшилаш борасида амалга оширилаётган ишлар бўйича тегишли идоралар раҳбарларининг ахборотлари тингланди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)