Олий Мажлис Қонунчилик палатаси депуталаридан иборат гуруҳнинг ўрганиш натижалари халқ депутатлари Пахтаобод тумани кенгаши сессиясида муҳокама қилинди. Бу ҳақда палата матбуот хизмати хабар бермоқда.
Сессияда халқ вакиллари Пахтаобод тумани маркази ва қишлоқларида хонадонларда бўлиб, аҳоли яшаш шароити, эҳтиёжи, талаб ҳамда таклифлари билан яқиндан танишгани, фуқаролар томонидан 458 дан зиёд муаммоли масалалар ўртага ташлангани, улар асосан уй-жой-коммунал хизмати кўрсатиш, тиббиёт муассасалари фаолияти, таълим, бандлик, тадбиркорлик, экология, ижтимоий инфратузилма билан боғлиқлиги таъкидланди.
Пахтаобод туманидаги 25 та ҚВП ва марказий поликлиника, тез ёрдам хизмати фаолияти таҳлил қилинди. Мазкур шифо масканларида лаборатор-текширув учун мўлжалланган асбоб-ускуналар, патронаж сумкалари, реактивлар, биринчи ёрдам кўрсатиш учун зарур дори воситалари ва тиббий жиҳозлар етишмаслиги аниқланди. Мулоқотлар чоғида ҳудудларда тор мутахассисларга бўлган талаб ва эҳтиёж юқорилиги таъкидланди.
Ҳудуддаги электр ҳамда газ таъминоти масаласи ўрганилганида, ушбу соҳаларда ҳам ўз ечимини кутаётган қатор муаммолар борлиги аниқланди. Банк муассасалари туман бўлимларидаги инфокиосклар ишламаслиги, савдо ҳамда маиший хизмат кўрсатиш объектларида, қатор деҳқон бозорларида харидорлар ва сотувчилар учун қулайликлар яратилмагани айтиб ўтилди.
Сессияда ҳудудни ижтимоий-иқтисодий ривожлантириш ва аҳоли турмуш даражасини оширишга тўсиқ бўлаётган камчилик ва нуқсонлар, кичик бизнес ва хусусий тадбиркорлик субъектлари, фермерларнинг ўз фаолиятини кенгайтириш, ер ажратиш, кредит олиш ҳамда бошқа масалалар юзасидан қилган мурожаатлари атрофлича таҳлил этилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)