Малайзия ташқи ишлар вазирлиги КХДРнинг Куала-Лумпурдаги элчиси Кан Чхолни персона нон грата деб эълон қилди. Meduza’нинг хабар беришича, шимолий кореялик дипломатга 48 соат ичида Малайзия ҳудудини тарк этиш ҳақида кўрсатма берилган.
Мазкур қарор Ким Чон Нам — КХДР етакчиси Ким Чен Иннинг акаси ўлдирилиши билан боғлиқ баёнот ортидан қабул қилинган. 4 март куни Шимолий Корея элчиси қотиллик юзасидан суриштирув ишларини олиб бораётган Малайзия ҳукуматига ишонмаслигини маълум қилган эди.
Бунга жавобан Малайзия ҳукумати элчидан узр сўрашни талаб қилган, бироқ элчи узр сўрамади.
КХДР етакчиси Ким Чен Инга ака ҳисобланган Ким Чон Нам 13 февраль куни Куала-Лумпур аэропортида ўлдирилган эди. Тергов маълумотларига кўра, икки аёл унинг юзига заҳарловчи модда суртилган матони ташлаган.
Қотиллик бўйича ҳар икки гумонланувчи қўлга олинган. Мазкур ҳодисадан сўнг Малайзия КХДР фуқароларига нисбатан амалда бўлган визасиз тартибни бекор қилган.
Расмий Пхеньян Ким Чон Намнинг ўлими юзасидан 2 март куни баёнот берди. КХДР расмийларининг фикрича, Ким Чон Нам, катта эҳтимол билан, юрак хуружидан вафот этган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)