Халқаро валюта жамғармаси раҳбарияти банк хизматларини ислом дини асосида тақдим этиш кенг тарқалган мамлакатларда молиявий барқарорликни мустаҳкамлаш бўйича тавсиялар тўпламини тасдиқлади, деб ёзади «ТАСС».
Шу муносабат билан ташкилот томонидан келтирилган маълумотларга кўра, ислом динига асосланган банк бизнеси дунёнинг 60 та мамлакатида мавжуд бўлиб, унинг активлари умумий ҳажми 2016 йил ҳолатига кўра, 1,5 триллион долларга баҳоланмоқда. 1990 йиллар охирида эса ушбу кўрсаткич бор-йўғи 100 миллиард долларга тенг бўлган.
Ҳужжатда айтилишича, дунёда ислом банклари улуши 2 фоизни ташкил этади. Аммо у тез ўсиб, сиёсий раҳбариятнинг тобора кўпроқ эътиборини жалб қилмоқда. Шунга мувофиқ, Халқаро валюта жамғармаси 2015 йилда Ислом молиявий хизматлари бўйича Куала-Лумпур кенгаши раҳбарлигида қабул қилинган стандартларни ҳамма жойда жорий қилишга даъват этмоқда. Улар қаторида муаммоли банклар билан боғлиқ вазиятни тартибга солишнинг амалий механизмларини ишлаб чиқиш, молиявий «суғурта тармоқлари»ни яратиш, сифатли суверен активлар чиқаришни тезлаштириш тилга олинди.
Изоҳ (0)