«Душанбе—Тошкент» авиарейси амалга ошмагани учун Somon Air’нинг тижорат ишлари бўйича директори лавозимидан четлатилди
«Душанбе—Тошкент» йўналиши бўйича биринчи мунтазам рейснинг амалга ошмай қолгани учун Somon Air авиакомпаниясининг тижорат ишлари бўйича директори Алишер Рустамов ва бир қатор жавобгар ходимлари эгаллаб турган лавозимидан озод қилинди. Бу ҳақда «Коммерсантъ» хабар бермоқда.
Авиакомпания томонидан тарқатилган расмий хабарномада қайд этилишича, улар бир қатор ҳужжатларни Ўзбекистон томонига «ўз вақтида» юбормагани учун айбдор деб топилган.
«Душанбе—Тошкент» йўналиши бўйлаб биринчи техник рейс 10 февраль куни амалга оширилган ва парвоз муваффақиятли ўтган эди. Шу куни Somon Air’га 20 февралдан бошлаб Тошкент аэропортига парвозларни амалга ошириш учун эксплуатацион рухсатнома тақдим этилган.
Бироқ, «Тошкент—Душанбе» йўналиши бўйлаб қайта рейсни амалга ошириши керак бўлган «Ўзбекистон ҳаво йўллари»дан маълум қилишларича, парвоздан бир кун аввал Тожикистон томони «мунтазам рейслар учун эмас, балки чартер рейслар» учун сўров юборган.
«Бундан ташқари, парвозларни амалга ошириш бўйича рухсат бериш масаласи Ўзбекистон Миллий хавфсизлик хизмати ва мамлакат ҳаво ҳужумидан мудофаа кучлари томонидан кўриб чиқилиши керак. Бунинг учун маълум вақт керак бўлади», — дейилади Ўзбекистон томони баёнотида.
Тожикистон нашрларининг қайд этишича, ҳозирги вақтда авиакомпаниялар қолган техник масалаларни ҳал этмоқда ва Ўзбекистон пойтахти сари биринчи самолёт «яқин кунлар ичида» парвоз қилади.
«Дарё»нинг Telegram’даги расмий канали — @toshqindaryo’га аъзо бўлинг!
