АТКР вазири ўринбосари Ким Нам Сок Ўзбекистондаги фаолиятини якунлади

Ўзбекистон билан меҳнат шартномаси муддати тугагани муносабати билан, ахборот технологиялари ва коммуникацияларини ривожлантириш вазирининг ўринбосари — АКТ бўйича маслаҳатчи, жанубий кореялик Ким Нам Сок Ўзбекистондаги фаолиятига якун ясади.

Бу ҳақда, «Газета.uz»нинг ёзишича, вазирлик матбуот хизмати хабар қилган. Ким Нам Сок Ўзбекистондаги фаолиятини 2013 йилда бошлаган эди.

Бир вақтнинг ўзида у билан Тошкент ахборот технологиялари университети проректори — АКТ бўйича маслаҳатчи Ли Чул Су ҳам Ўзбекистондаги фаолиятини якунламоқда.

Ким Нам Сок Жанубий Кореянинг электрон ҳукумат ва АКТни жадал ривожлантириш бўйича тажрибасини ўзлаштириш асосида ишлаб чиқилган «2013—2020 йилларда Ўзбекистон Республикасининг Миллий ахборот-коммуникация тизимини ривожлантиришнинг комплекс дастури»ни шакллантиришда фаол иштирок этган. Шунингдек, у Ўзбекистоннинг барча ҳудудларида бўлиб, давлат ва маҳаллий бошқарув органлари ходимлари учун ўқув семинарлари ўтказган.

Унинг таклиф-тавсиялари асосида мамлакатда «Электрон ҳукумат» тизимини ривожлантириш ҳамда Ахборот хавфсизлигини таъминлаш марказлари фаолияти йўлга қўйилган. Ким Нам Сок электрон ҳукумат ва иқтисодиётнинг реал сектори учун ахборот тизимлари ва дастурий маҳсулотлар ишлаб чиқарувчи LG CNS Uzbekistan қўшма корхонасининг ташкил этилишида ҳам жонбозлик кўрсатган.

Ким Нам Сок 2016 йилда Ўзбекистон Президентининг фармонига кўра «Меҳнат шуҳрати» ордени билан тақдирланган эди.

«Ким Нам Сок Ўзбекистоннинг Биринчи Президенти Ислом Каримовга, Ўзбекистон ҳукуматига мамлакатда самарали меҳнат қилиши учун яратиб берилган қулай шарт-шароитларга чуқур миннатдорчилик билдирди», — дейилади вазирлик ахборотида.

Ким Нам Сок (1956 йилда таваллуд топган) Кёнсон олий мактаби (1975 йил) ва Ханян университети (1980), Аризона университети (АҚШ, 1986) ва Сонгюнгван университети (Жанубий Корея, 1989) битирувчиси. Муқаддам Жанубий Корея давлат бошқаруви ва хавфсизлик вазирининг биринчи ўринбосари лавозимида фаолият олиб борган.

«Дарё»нинг Telegram’даги расмий канали — @toshqindaryo’га аъзо бўлинг!