Хитой махсус хизматлари КХДР етакчиси Ким Чен Иннинг хорижда яшаган ва Малайзияда ўлдирилган акаси Ким Чон Намни тахминан 2000 йилдан бошлаб қўриқлаб келган. Бу ҳақда Япониянинг Sankei Shimbun газетаси маълум қилди, дея хабар беради «ТАСС».
Нашрга кўра, Ким Чон Нам вазият ўзгарган тақдирда КХДР асосчиси Ким Ир Сен ва отаси, мамлакатнинг собиқ раҳбари Ким Чен Ирнинг тўғридан-тўғри вориси сифатида Пхеньянда ҳокимиятга даъвогарлик қилиши мумкин эди.
Ким Чон Нам сўнгги йилларда Пекин, Макао ва Сингапурда истиқомат қилиб келган ва бу шаҳарларнинг ҳар бирида оиласи ҳамда фарзандлари бўлган. Унинг ҳаёт кечириши учун зарур маблағни Хитой билан боғлиқ компаниялар таъминлаб келгани билдирилмоқда.
Хитойда бўлган вақти Ким Чон Нам нисбатан эмин-эркин юрган, бироқ Сингапур ёки Макаога сафарлари давомида уни ва яқинларини Пекиндан жўнатилган гуруҳлар қўриқлаб турган.
«Бироқ бу гал негадир қўриқлаш тизими иш бермаган. Куала-Лумпур аэропортидаги қасд акс этган манбаларда қўриқчиларга ўхшаш ҳеч ким қайд этилмаган», — деб ёзади япон нашри.
Газета шундан келиб чиқиб, Хитой қандайдир сабабларга кўра Ким Чон Намни ўзига яқин олишдан воз кечган бўлиши ҳам мумкин, деган тахминни илгари сурган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)