Ким Чон Намни Куала-Лумпур аэропортида ўлдириб кетганликда гумонланаётганларга уни заҳарлаш учун беш сония етарли бўлган. КХДР етакчиси Ким Чен Иннинг акаси ўлимининг бундай версиясини New Straits Times газетаси чоп этди, деб ёзади «ТАСС».
Нашр ёзишича, учиш терминалидаги кузатув камераларидан олинган маълумотларга кўра, икки аёл ўз объектини узоқ вақт давомида кузатган ва унинг атрофидаги одамлар сийраклашишини кутиб, қулай лаҳзани танлаган. Сўнг аёллардан бири Ким Чон Нам билан суҳбатлаша бошлаган, иккинчиси эса унинг ортида туриб, уни заҳарлаган. Аммо ҳозирча заҳар қандай қилиб Ким Чон Намнинг танасига синггани номаълум. Шундан кейин аёллар терминални тарк этиб, таксида қочиб кетган.
«Бутун операция аниқ режалаштирилган ва бекам-у кўст амалга оширилган, агар кузатув камералари бўлмаганида ким ҳужум қилганини аниқлаб бўлмасди», — дея газета полиция вакили фикрини келтирди.
Эслатиб ўтамиз, Малайзия полицияси пойтахт аэропортида вафот этган КХДР фуқароси Ким Чон Нам эканлигини тасдиқлади. «У Макаога парвозни кутиб, иккинчи терминалда ўтирган. Бу одам ердаги хизматлар ходимларига мурожаат қилиб, кучли бош айланишидан шикоят қилган. У, шунингдек, номаълум кимса унинг юзига суюқлик сепиб юбориб, сўнг қочиб кетгани ҳақида айтиб берган», — дея маълум қилди Селангор штати полицияси раҳбарининг ёрдамчиси.
Изоҳ (0)