Ўзбекистонда Минтақавий автомобиль йўлларини ривожлантириш дастури қабул қилинди

Ўзбекистон Президентининг қарори билан, 2017—2018 йилларда минтақавий автомобиль йўлларини ривожлантириш дастури тасдиқланди. Бу ҳақда ЎзА хабар бермоқда.

Қарор шарҳида баён этилишича, қишлоқ автомобиль йўллари, шаҳарлар, шаҳар посёлкалари, қишлоқлар ва овуллардаги автомобиль йўлларининг аксарият қисми белгиланган сифат ва хавфсиз ҳаракатланиш талабларига жавоб бермайди.

Янги турар жой мавзеларининг барпо этилиши, шаҳарларнинг кенгайтирилиши, транспорт воситалари сонининг жиддий кўпайиши минтақавий автомобиль йўллари ҳолатини тубдан яхшилаш юзасидан амалий чора-тадбирлар кўришни талаб қилмоқда.

Қабул қилинган дастурга мувофиқ, 2017—2018 йилларда 5 454 километр, жумладан, 2017 йилда 2 700 километр, 2018 йилда эса 2 754 километр хўжаликлараро қишлоқ автомобиль йўллари, шаҳарлар, шаҳар посёлкалари, қишлоқ ва овулларнинг кўчаларини капитал ва жорий таъмирлаш кўзда тутилган.

Хусусан, Қорақалпоғистон бўйича 295 километр, Андижон вилояти бўйича — 324 километр, Бухоро вилояти бўйича — 439 километр, Жиззах вилояти бўйича — 222 километр, Қашқадарё вилояти бўйича — 679 километр, Навоий вилояти бўйича — 216 километр, Наманган вилояти бўйича — 309 километр, Самарқанд вилояти бўйича — 479 километр, Сурхондарё вилояти бўйича — 535 километр, Сирдарё вилояти бўйича — 267 километр, Тошкент вилояти бўйича — 516 километр, Фарғона вилояти бўйича — 520 километр, Хоразм вилояти бўйича — 321 километр ва Тошкент шаҳри бўйича — 332 километр йўллар ва кўчаларни таъмирлаш назарда тутилган.

Бундан ташқари, хўжаликлараро қишлоқ автомобиль йўллари, шаҳарлар, шаҳар посёлкалари, қишлоқ ва овулларнинг кўчаларини жорий таъмирлаш ишларини бажариш учун минтақавий йўлларни таъмирлашга ихтисослаштирилган ташкилотларни 330 та йўл техникаси билан таъминланади.