Лондон мэри Содиқ Хон эски дизель автомобиллари эгаларига улар ўз машиналарини атроф-муҳитга камроқ зарар етказадиган двигателли машиналарга алмаштириши учун 3,5 минг фунт стерлинггача пул тўлашни таклиф қилмоқда, деб ёзади «РИА Новости».
Сўнгги ойларда Лондонда об-ҳаво шароитлари ва кўчаларнинг транспорт билан тўлиб кетганлиги туфайли ҳавонинг ифлосланганлик даражаси кескин ошди. Мэрия вазиятни бир неча марта фавқулодда деб эълон қилди ва фуқароларга алоҳида зарурият бўлмаса, автомобилда ҳаракатланмасликни сўраб мурожаат қилди.
«Хон ҳукуматни эски автомобилларни утилизация қилиш схемасини киритишга чақирмоқда, унинг қиймати 500 миллион фунтга баҳоланмоқда. Ушбу схема кам даромадли фуқароларга ва унчалик муваффақиятли бўлмаган бизнесменларга эски автомобиллардан қутулиш имконини беради», — деб ёзади Guardian.
Британияда дизелли автомобилларни сотишни рағбатлантириш сиёсати бензинли двигателлар ажратиб чиқарадиган газлар таркибидаги углерод диоксиди глобал исишга таъсир ўтказадиган энг хавфли газ эканлиги аниқлангач қабул қилинди. Айни пайтда олимлар ва ҳукумат вакиллари дизелли двигателлар ажратадиган газлар таркибида бўладиган азот оксидининг чиқарилиши ҳажми ортиб бораётганидан хавотир билдирмоқда.
Мэр таклиф қилаётган дастурга мувофиқ, микроавтобуслар ҳайдовчиларига ўз автомобилларини экологияга зиёни камроғига алмаштириши учун 3,5 минг фунт стерлинг, кам таъминланган оилаларга эса 2 минг фунт стерлинг берилади.
Изоҳ (0)