Туркманистон президенти сайловида рўйхатга олинган сайловчиларнинг 97,27 фоизи қатнашди. Бу ҳақда, Туркманистон сайловлар ва референдумлар ўтказиш бўйича марказий комиссияси маълумотларига асосланиб, «Коммерсантъ» хабар бермоқда.
Комиссиядан маълум қилишларича, сайлов рўйхатига киритилганлардан 3 миллион 140 минг 865 киши овоз беришда қатнашган. Сайлов участкалари маҳаллий вақт билан 19:00 (Тошкент вақти билан ҳам 19:00) ёпилган. Сайловнинг дастлабки натижалари 13 февраль, душанба куни эълон қилинади.
Туркманистон президенти ўрни учун тўққиз киши кураш олиб бормоқда. Мамлакатнинг амалдаги раҳбари Гурбангули Бердимуҳамедов сайлов фаворити ҳисобланади.
Президентлик курсиси учун, шунингдек, Саноатчилар ва тадбиркорлар партиясидан Бекмират Аталиев, Аграр партиядан Дурдиқилич Ўразов ва номзоди фуқароларнинг ташаббускор гуруҳларидан илгари сурилган олти киши даъвогарлик қилмоқда.
Туркманистонда 2016 йил сентябрида конституциянинг янги таҳрири қабул қилинган. Унга кўра, президентнинг ваколат муддати бешдан йилдан етти йилгача узайтирилган.
59 ёшли Гурбангули Бердимуҳамедов 2007 йилдан бери ҳокимият тепасида. 2012 йили у иккинчи марта беш йиллик муддатга сайланган эди.
Изоҳ (0)