Ўзбекистонда пахта теришда ташкиллаштирилган болалар меҳнати амалиёти тугатилишига эришилди. Бу ҳақда Халқаро меҳнат ташкилоти (ХМТ) 1 февралда эълон қилинган баёнотида маълум қилди, деб ёзади «Газета.uz».
«Болалар меҳнатининг номақбуллиги жамиятнинг барча қатламлари: ҳукумат, ўқитувчилар, мутахассислар, фермерлар, ота-оналар ва болаларнинг ўзлари томонидан тан олинади. Ўзбекистон ташкиллаштирилган болалар меҳнати амалиётини тугатди», — дейилади ХМТнинг 2016 йилги пахта териш кампанияси устидан мустақил мониторинг якунлари бўйича ҳисоботида.
Ҳужжатда қайд этилишича, 2016 йил сентябрь—октябридаги пахта териш даврида ўтказилган умуммиллий ахборот кампанияси шарофати билан мамлакат жамоатчилиги меҳнат муносабатларининг тақиқланган амалиётлари ҳақида яхшироқ хабардор бўлди.
ХМТ Ўзбекистонда болалар меҳнати ва мажбурий меҳнатга қарши курашишга йўналтирилган чоралар ва давлат мажбуриятлари амалга ошиши юзасидан мониторинг ўтказди ва «Жаҳон банки томонидан қўллаб-қувватланаётган аграр ва сув секторларидаги, шунингдек, таълим секторидаги лойиҳалар доирасида болалар меҳнати ва мажбурий меҳнат ҳолатлари аниқланмаганлиги» ҳақида ҳисоб берди.
Шу билан бирга, ХМТ фуқароларнинг баъзи тоифалари, шу жумладан, талабалар, таълим ва соғлиқни сақлаш муассасалари ходимлари ва давлат хизматчилари учун мажбурий меҳнат хавфлари ҳамон сақланиб қолаётганини эслатди.
Изоҳ (0)