Адлия вазирлигида юридик хизматлар фаолиятидаги ўзгаришлар муҳокама қилинди

Адлия вазирлиги томонидан ўтказилган анжуманда Ўзбекистон Президентининг «Юридик хизматлар фаолиятини тубдан такомиллаштириш чора-тадбирлари тўғрисида»ги қарори ижроси ва юридик хизматлар фаолиятидаги ўзгаришлар муҳокама қилинди. Бу ҳақда вазирлик матбуот хизматига таяниб, «Газета.uz» хабар бермоқда.

Анжуман иштирокчиларининг фикрича, давлат органлари юристлари моддий таъминотининг етарли эмаслиги олий маълумотли ва иш тажрибасига эга малакали кадрларнинг жалб қилинишига тўсқинлик қилган, юридик хизматлар фаолияти сифатига салбий таъсир кўрсатган. Бу қуйидаги рақамларда ҳам ўз ифодасини топган: бугунги кунда давлат идораларида юридик хизматлар штат бирликлари миқдори 3300 дан ошиқни ташкил этади, амалда фаолият кўрсатаётган юристлар сони эса 2600 нафар атрофида.

Давлат раҳбари қарорида ҳам юридик хизматларни ташкил этишда тартибнинг йўқлиги ва улар штат бирликларида нормативларнинг мавжуд эмаслиги таъкидлаб ўтилган. Юридик хизматларда ҳуқуқларнинг амалиётга мослигини ўрганиш, қонунчиликни такомиллаштириш бўйича таклифларни тайёрлаш ишлари олиб борилмаган.

Президентнинг юридик хизматлар фаолиятини яхшилаш тўғрисидаги қарори давлат органларида юристлар ролини оширади. Эндиликда буйруқлар, қарорлар, шартномалар ва бошқа ҳужжатлар лойиҳалари мажбурий тартибда юридик хизматлар томонидан ҳуқуқий экспертизадан ўтказилади. Давлат идораларида юридик хизматлар ходимларини ишга тайинлаш ва вазифасидан озод қилиш учун адлия органлари билан келишиш шарт.

Ҳужжатда юридик хизматлар ходимларининг моддий рағбатлантирилиши ҳам белгиланган. Ҳар чоракда улар судда ёки судгача тартибда давлат органлари фойдасига ундирилган маблағнинг 5 фоизи миқдорида мукофотланади. Шунингдек, уларнинг мансаб тоифаларига Вазирлар Маҳкамаси томонидан қўшимча ойлик иш ҳақи белгиланади.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.