«Нима, кўп йиллар аввал Берлин девори қулагани ёддан чиқдими?». Эрон президенти Дональд Трампни танқид қилди

Эрон президенти Ҳасан Руҳоний АҚШ президенти Дональд Трампнинг қочоқлар ва Мексика билан чегарада девор қуриш ҳақидаги фармонларига муносабат билдирди, дея хабар бермоқда Tasnim нашри.

«Ҳозир мамлакатлар ўртасида деворлар қурадиган замон эмас. Нима, улар бундан кўп йиллар аввал Берлин девори қулаганини ёддан чиқаришдими?», — деди Руҳоний.

Руҳонийнинг қайд этишича, агар ҳозир бирор-бир мамлакат ўртасида деворлар бўлса, «уларни ҳам йўқ қилиш керак».

Эрон президентининг сўзларига кўра, ҳозирги кунда маданий, илмий ва цивилизация жиҳатидан ҳамма бир-бирига қўшни, технологиялар эса турли давлатлар орасидаги улкан масофаларни ортда қолдиришга имкон бермоқда.

«Бугунги кунда ҳеч ким глобаллашувга қарши туриш қудратига эга эмас», — дея қайд этди Руҳоний.

Аввалроқ АҚШ президенти Дональд Трамп сайловолди ваъдаларидан бирини бажариш мақсадида, Мексика билан чегарада девор қуриш ҳақидаги фармонни имзолаган эди. Трамп қурилиш билан боғлиқ харажатларни қоплаш учун Мексикадан импорт қилинадиган маҳсулотларга солиқ солмоқчи.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.