Dow Jones индекси тарихда илк бор 20 минг пунктдан ошди

Dow Jones индекси 25 январь тонгидаги савдолар чоғида тарихда илк бор 20 минг пунктдан ошди, дея хабар бермоқда Meduza.

Дональд Трампнинг ғалабаси билан якунига етган 8 ноябрдаги АҚШ президент сайлови кунидан бери индекс қарийб 10 фоизга ўсган.

Трамп сайланган вақтдан бери Dow Jones индекси бир неча бор 20 минг пунктга яқинлашган эди — масалан, 6 январь куни 0,37 пункт етмай қолди.

Қайд этиш жоиз, 2008 йилги молиявий инқироздан бери Dow Jones индекси икки баробардан кўпроққа ўсган.

«Индекснинг кескин ўсиши Трамп иқтисодий ўсишни ошириш ва Америка компанияларини тартибга солишни камайтиришга қаратилган сиёсат олиб боради, деган умидлардан куч олмоқда», — деб ёзади The Guardian.

Dow Jones АҚШ иқтисодиётидаги аҳволни қисман кўрсатиб бера олади. У Американинг энг йирик 30 та компанияси котировкаларига асосланади.

Умуман олганда, нисбатан кенг бозор индекси ҳисобланган S&P 500 ҳам сўнгги вақтларда ўсмоқда: у 8 ноябрдан бери деярли 6 фоизга ўсган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.