АҚШ президенти Дональд Трамп Америка—Мексика чегарасидаги девор қурилиши «яқин ойлар ичида» бошланишини маълум қилди. «РБК»нинг ёзишича, бу ҳақда у ABC News телеканалига берган интервьюсида айтиб ўтган.
Трампнинг яна бир карра қайд этишича, девор қурилиши учун пулни Мексика тўлайди ҳамда АҚШ ва Мексиканинг бу борадаги музокаралари «жуда тез орада» бўлиб ўтади. Трампнинг баён этишича, Мексика деворни қуриш бўйича АҚШ харажатларини «100 фоиз» қоплаб беради.
АҚШ президентининг тасдиқлашича, қурилишнинг дастлабки босқичи америкалик солиқ тўловчилар томонидан молиялаштирилади, бироқ бу пуллар ўрни АҚШ кейинроқ Мексикадан оладиган маблағлар ҳисобига тўлдирилади.
«Мен сизга айтяпман, улар тўлайди. Балки бу осон бўлмас. Мен қилаётган иш АҚШ учун яхши, Мексика учун ҳам яхши бўлади. Биз Мексика барқарор ва жуда мустаҳкам бўлишини истаймиз», — деди Трамп.
Мексика ва АҚШ ўртасида девор қуриш режалари ҳақида Трамп ўз сайловолди кампанияси вақтидаёқ маълум қилган. Унинг сўзларига кўра, бу Мексикадан АҚШга келаётган ноқонуний муҳожирлар оқимини камайтиришга ёрдам беради.
Январь бошида Трамп девор қурилиши бўйича барча харажатлар Мексика томонидан қопланишини маълум қилган эди. Бунга жавобан, Мексика президенти Энрике Пеня Нето девор учун Мексика пул тўламаслигини билдирди.
Аввалроқ CNN телеканали, АҚШ Конгрессининг вакиллар палатасидаги манбаларга асосланиб, Трамп девор қурилиши учун маблағни федерал бюджетдан сўраб олиши мумкинлиги ҳақида хабар берган эди.
Бунинг учун у Мексика ва АҚШ ўртасида девор қурилишини кўзда тутувчи 2006 йилда қабул қилинган қонундан фойдаланиши мумкин — ушбу қонун ўша вақтда молиялаштиришнинг етарли эмаслиги сабаб бажарилмаган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)