Ўзбекистон Президенти Шавкат Мирзиёевнинг 25 январдаги «Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида»ги қарорига мувофиқ, Самарқанд шаҳрида Ислом Каримов музейи ташкил этилади. Бу ҳақда ЎзА хабар бермоқда.
Қарорга мувофиқ, Ўзбекистон Биринчи Президенти кўп йиллар давомида фаолият олиб борган Тошкент шаҳридаги Оқсарой қароргоҳида (Ўзбекистон кўчаси, 45-уй) Ислом Каримов номидаги илмий-маърифий ёдгорлик мажмуасини ташкил этилади.
Айни вақтда, Ислом Каримов номидаги Республика хайрия жамоат фонди ҳам ушбу манзил бўйича жойлаштирилади.
Ўз навбатида, Ўзбекистон Президенти Шавкат Мирзиёев Самарқанд шаҳрида Ислом Каримов музейини ташкил этиш ҳақида ҳам кўрсатма берган.
Мазкур топшириқлар ижроси Маданият ва спорт ишлари вазирлиги, Молия вазирлиги, Адлия вазирлиги, Ўзбекистон Фанлар академияси, Ўзбекистон Бадиий академияси, Тошкент шаҳри ва Самарқанд вилояти ҳокимликлари зиммасига юклатилган.Мазкур қарор «халқимизнинг самимий тилаклари ва хоҳиш-иродасидан келиб чиқиб, она Ватанимиз мустақиллиги, эл-юртимиз равнақи йўлидаги буюк тарихий хизматларини инобатга олиб, Ўзбекистоннинг Биринчи Президенти, Ўзбекистон Қаҳрамони Ислом Абдуғаниевич Каримовнинг ёрқин хотирасини абадийлаштириш мақсадида» қабул қилинган.
Аввалроқ Ўзбекистонда ҳар йили Ислом Каримов таваллуд топган сана (30 январь) мамлакат бўйлаб кенг нишонланиши, Биринчи Президент вафот этган сана (2 сентябрь) эса Хотира куни сифатида ёд этилиши ҳақида хабар берилган эди.
Бундан ташқари, Тошкент халқаро аэропорти, Асакадаги автозавод, мамлакат бўйлаб марказий кўчалар ва бошқа қатор объектларга Ислом Каримов номи берилиши маълум бўлган эди.Шунингдек, Самарқанд шаҳрида Ислом Каримов ёдгорлик мажмуаси қурилиши, Тошкент, Самарқанд, Қарши шаҳарларига эса Ислом Каримовнинг ҳайкаллари ўрнатилиши ҳақида ҳам ахборот берилган эди.Ўзбекистон Биринчи Президенти Ислом Каримов 2016 йил 2 сентябрь куни вафот этган эди. У 3 сентябрь куни Самарқанднинг Ҳазрати Ҳизр масжидидаги қадимий қабристонга дафн этилган.Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)