Тошкент, Самарқанд ва Қаршида Ислом Каримовга ҳайкаллар ўрнатилади

Ўзбекистоннинг учта шаҳрида мамлакат Биринчи Президенти Ислом Каримов шарафига ҳайкаллар ўрнатилади. Бу ҳақда Ўзбекистон Президенти Шавкат Мирзиёев томонидан 25 январь куни имзоланган «Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида»ги қарорда сўз боради.

Қарорга мувофиқ, Ислом Каримов сиймосини яратиш бўйича халқаро ижодий танловда ғолиб деб топилган ҳайкаллар

• Ўзбекистон пойтахти Тошкент шаҳрига;
• Ислом Каримов туғилиб ўсган Самарқанд шаҳрига;
• у киши биринчи раҳбар бўлиб ишлаган Қашқадарё вилоятининг Қарши шаҳрига ўрнатилади.

Мазкур қарор «халқимизнинг самимий тилаклари ва хоҳиш-иродасидан келиб чиқиб, она Ватанимиз мустақиллиги, эл-юртимиз равнақи йўлидаги буюк тарихий хизматларини инобатга олиб, Ўзбекистоннинг Биринчи Президенти, Ўзбекистон Қаҳрамони Ислом Абдуғаниевич Каримовнинг ёрқин хотирасини абадийлаштириш мақсадида» қабул қилинган.

Аввалроқ Ўзбекистонда ҳар йили Ислом Каримов таваллуд топган сана (30 январь) мамлакат бўйлаб кенг нишонланиши, Биринчи Президент вафот этган сана (2 сентябрь) эса Хотира куни сифатида ёд этилиши ҳақида хабар берилган эди.

Бундан ташқари, Тошкент халқаро аэропорти, Асакадаги автозавод, мамлакат бўйлаб марказий кўчалар ва бошқа қатор объектларга Ислом Каримов номи берилиши, Самарқанд шаҳрида эса Ислом Каримов ёдгорлик мажмуаси қурилиши маълум бўлди.Ўзбекистон Биринчи Президенти Ислом Каримов 2016 йил 2 сентябрь куни вафот этган эди. У 3 сентябрь куни Самарқанднинг Ҳазрати Ҳизр масжидидаги қадимий қабристонга дафн этилган.Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.