Финляндия ўз ҳудудида АҚШ президенти Дональд Трамп ва Россия президенти Владимир Путин иштирокида Арктика кенгаши саммитини ўтказишга тайёр. Бу ҳақда Финляндия ҳукумати раҳбари Юха Сипиля маълум қилди, дея хабар бермоқда «ТАСС».
«Агар сиёсий вазият етилса, биз Арктика саммитини ўзимизда қабул қилишга тайёрмиз. Кўп нарса сиёсат оламидаги вазият ва шарт-шароитларга боғлиқ, улар қандай бўлишини ҳозирдан билмаймиз. Ҳозирча Россия ва АҚШдан бу борада ҳеч қандай сигнал олганимиз йўқ», — деди Финляндия ҳукумати раҳбари.
Арктика кенгашига икки йил муддатга раислик 2017 йил майида Финляндиядан АҚШга ўтади. Шу муносабат билан, мамлакатда кенгашнинг олий даражадаги саммитини ўтказиш имконияти кўпдан бери муҳокама қилинмоқда.
Декабрда финляндиялик юқори мартабали дипломат Алекси Харконен АҚШ ва Россия етакчилари 2017 йилнинг биринчи ярмида Финляндияда ўтказилиши кутилаётган Арктика кенгаши саммитида ўзаро учрашиши мумкинлигини айтиб ўтган эди.
Арктика кенгаши 1996 йили Оттава декларациясига мувофиқ ташкил этилган бўлиб, юқори даражадаги ҳукуматлараро форум ҳисобланади. У Арктика минтақаси бўйича ҳамкорликка, айниқса атроф-муҳитни муҳофаза қилиш масалаларига кўмак бериш мақсадида тузилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)