«Мегафон» акциядорлари Алишер Усмоновга қарашли компаниялардан 740 млн доллар эвазига Mail.ru Group акциялари сотиб олинишини маъқуллади

Россиянинг «Мегафон» мобил оператори акциядорлари навбатдан ташқари умумий йиғилишда Алишер Усмоновнинг USM холдинги таркибига кирувчи компаниялардан Mail.ru Group акцияларининг сотиб олинишини маъқуллади. Бу ҳақда «ТАСС» хабар берди.

Россия Федерал аксилмонопол хизмати 11 январь куни «Мегафон»дан мазкур активлар харидига оид талабнома олди. Хизмат раҳбари Игорь Артемьев муассаса ушбу келишувда ҳозирча ҳеч қандай муаммолар кўрмаётганини билдирди. Хизмат талабномани бир ой муддатда кўриб чиқади.

Маълумот учун, ўтган йил декабрида «Мегафон» директорлар кенгаши Mail.ru Group акцияларининг 63,8 фоизини 740 миллион доллар эвазига харид қилинишини маъқуллаганди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.