Остонадаги Сурия бўйича музокаралар вақтида араб журналистлари муштлашиб кетди

Сурия масаласи бўйича Қозоғистон пойтахти Остонада бўлиб ўтаётган музокаралар чоғида араб оммавий ахборот воситалари мухбирлари муштлашиб кетди. Бу ҳақда «РИА Новости» хабар бермоқда.

Ҳодиса Rixos меҳмонхонаси лоббисида, музокараларда қатнашаётган расмий Дамашқ делегациясининг раҳбари, Суриянинг БМТдаги доимий вакили Башар ал-Жаъфарий журналистлар олдига чиқиб келган вақтда юз берган.

Журналистлар ал-Жаъфарийни қуршаб олган, айни вақтда, операторлардан бири ҳамкасбларидан, тасвирга олишда халал бермасликлари учун, «бошларини олиб туришни» бир неча бор сўраган.

Бир вақт журналистлар араб тилида бақира, муштлашиб кетган. Бироқ уларни тезда тинчлантиришган.

«РИА Новости»нинг алоҳида қайд этишича, Сурия делегацияси раҳбари мазкур ҳодисага ҳеч қандай муносабат билдирмади.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.