АҚШнинг қатор штатларига ёпирилган кучли довул, торнадо ва сув тошқинлари оқибатида ҳалок бўлганлар сони 20 нафарга етди. Бу ҳақда «ТАСС» хабар бермоқда.
Сўнгги икки қурбондан бири Калифорниянинг Мендосино округидан, иккинчиси эса Сан-Диего округидан топилган. Яна уч киши, жумладан, бир болакай бедарак йўқолганлар рўйхатида турибди.
Аввалроқ табиий офат натижасида АҚШнинг Жоржия штатида 14 киши, Миссисипида эса тўрт киши ҳалок бўлгани ҳақида хабар берилган эди.
Жоржия губернатори Натан Дил табиий офатдан айниқса кўп зарар кўрган штатнинг айрим округларида фавқулодда ҳолат тартибини эълон қилган. Миссисипининг айрим ҳудудларида ҳам шундай тартиб ўрнатилган.
Табиий офат кучини, шунингдек, Техас, Алабама, Луизиана ва Флорида штатлари ҳам ўзида ҳис қилиб кўрган, бироқ бу штатлардан қурбонлар ҳақида ахборот келиб тушмаган; баъзи ҳудудларда уй ва бинолар зарар кўргани ва вайрон бўлгани ҳақида маълумотлар бор.
АҚШ президенти Дональд Трамп Жоржия, Флорида ва Алабамага федерал ёрдам кўрсатишга ваъда берди. Унинг сўзларига кўра, бу штатлар табиий офат натижасида «жиддий талофат» кўрган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)