Ўзбекистон чемпиони «Локомотив» бугун — 20 январь куни Россия чемпионатида иккинчи бўлиб турган «Зенит» билан ўйнайди

Амирлик йиғинида бўлиб турган Тошкентнинг «Локомотив» футбол клуби бугун — 20 январь санасида Санкт-Петербургнинг «Зенит» клубига қарши ўртоқлик ўйинида иштирок этади. Бу ҳақда «темирйўлчилар» матбуот хизмати хабар берди.

Беллашув Дубай шаҳридаги Jabel Ali стадионида ўтади. Режага кўра у Тошкент вақти билан 17:00 да старт олади.

«Локомотив» Ўзбекистоннинг амалдаги чемпиони ва кубоги соҳиби ҳисобланади. Мирко Йеличич бошқарувидаги жамоа Осиё чемпионлар лигаси турнири учун тайёргарликни давом эттирмоқда. «Зенит» эса якунига етган 17 та турдан сўнг Россия Премьер-лигасида 2-ўринни эгаллаб турибди. Мирча Луческу шогирдлари пешқадам — Москванинг «Спартак» клубидан 5 очко ортда қолмоқда.

«Зенит» аввалроқ ўзбекистонлик футболчи Анзур Исмоилов тўп сурадиган Хитойнинг «Чанчун Ятаи» клубига қарши саф тортиб, 5:2 ҳисобида зафар қучганди. Ўйинда ҳисобни очиб берган голга айнан Анзур Исмоилов муаллифлик қилган.

Маълумот учун, «Зенит»га қарши ўйин олдидан «Локомотив» асосий таркибнинг беш нафар футболчиси билан хайрлашиб улгурганди. Неманья Яничич ва Артур Геворкян билан шартнома узайтирилмаган бўлса, Сервер Жепаров Эроннинг «Истиқлол» клуби билан келишувга эришди. Қатарнинг «Ас-Сайлия» клуби эса Темурхўжа Абдухолиқов ва Санжар Шоаҳмедовни олиб кетди.