Моуриньога жой бор, Гвардиолага эса йўқ: УЕФА барча даврларнинг энг яхши мураббийлари рўйхатини эълон қилди

УЕФА барча даврларнинг энг яхши мураббийлари 10 талик рейтингини эълон қилди. Рўйхатдан «Барселона» билан 14 та, «Бавария» билан 7 та совринни қўлга киритган, хусусан, Европа Чемпионлар Лигасида 2 марта ғолиб чиққан, ҳозирги даврнинг энг совриндор мураббийларидан бири Хосеп Гвардиола тушиб қолган.

УЕФА ташкил этилган 1954 йилдан то ҳозирги давргача бўлган оралиқда фаолият юритган шунингдек, фаолиятини давом эттираётган энг яхши 10 мураббийни қамраб олган рўйхат ва бу мутахассисларнинг қисқача таржимаи ҳоли билан қуйида танишишингиз мумкин.

Брайан Клаф

Кичик клублар билан мураббийлик соҳасида катта ютуқларга эришган Брайан Клаф футболчи сифатида ҳам юксак савия­да ўйнаб, Англия чемпионатларидаги 274 та учрашувда 251 та гол урган. 29 ёшида эса оғир жароҳат туфайли футболчилик фаолиятини якунлаб, мураббийликни бошлайди. Мураббий сифатида 1971/1972 йилги мавсумда камтаргина «Дерби Каунти» билан Англия чемпионлигини, «Ноттингем Форест» билан эса икки марта — 1979 ва 1980 йилларда Европа Чемпионлар Кубогини қўлга киритади.

Йохан Кройфф

Ўз даврининг энг кучли футболчиларидан бири бўлган Йохан Кройфф мураббийлик фаолиятида ҳам улкан чўққиларга эришган. Уч бора «Олтин тўп» соҳиби мураббийлик фаолияти даврида Нидерландиянинг «Аякс» клуби билан икки марта мамлакат кубоги ва бир марта — 1987 йили Европа Кубок эгалари кубогида ғолиб чиқади.

Кройффнинг мураббийликдаги энг катта муваффақиятлари Каталониянинг «Барселона» жамоаси билан боғлиқ. Жумладан, голландиялик мутахассис клуб билан Испания чемпионатида қаторасига 4 марта ғалаба қозонган ягона мураббийдир.

Висенте дель Боске

Ҳам терма жамоа, ҳам клуб миқёсида катта ғалабаларга эриша олган кам сонли мураббийлардан бири. Висенте дель Боске фаолияти давомида Мадриднинг «Реал» жамоаси билан икки марта УЕФА Чемпионлар лигаси ғолибига айланган бўлса, Испания терма жамоаси билан эса бир мартадан Европа чемпионати ҳамда Жаҳон чемпионати мусобақалари ғолиблигини қўлга киритган.

Сэр Алекс Фергюссон

Сўзсиз, дунёнинг энг яхши мураббийларидан бири. 1986 йилдан 2013 йилга қадар Англиянинг «Манчестер Юнайтед» жамоасига устозлик қилди. Бу орада мураббий Англия Премьер-лигасида 13 марта, Европа Кубок эгалари кубогида 1 марта, УЕФА Чемпионлар Лигасида эса 2 марта ғолибга айланди.

Эленио Эррера

Асли келиб чиқиши испаниялик бўлган Эррера Аргентинада туғилган. Мураббий сифатида у Мадриднинг «Атлетико», Каталониянинг «Барселона», Миланнинг «Интер» жамоалари билан кўплаб совринларни қўлга киритган. «Интер» билан икки бор Чемпионлар Кубогини қўлга киритиш — шулар жумласидан.

Удо Латтек

Профессионал футболчи Удо Латтекнинг бирорта ҳам жиддий натижаси йўқ. Лекин мураббий Удо Латтек катта-катта ютуқларга эриша олган. У «Бавария»ни қаторасига уч марта Германия чемпиони, 1974 йили эса Чемпионлар Кубоги соҳибига айлантирди. Кейинчалик Мёнхенгладбахнинг «Боруссия»сини бир неча бор миллий биринчиликда ва бир марта УЕФА Кубогида ғолиб қилди. У «Барселона» клубида ҳам самарали фаолият юритиб, Кубок эгалари кубогида ва Лига кубогида чемпион қилди. Шундан сўнг «Бавария»га қайтиб, жамоа билан бирга яна уч бор Германия чемпиони бўлди.

Валерий Лобановский

МДҲдаги энг совриндор мураббийлардан бўлган Валерий Лобановский 1997 йил УЕФА Чемпионлар Лигасининг гуруҳ босқичида Каталониянинг «Барселона» жамоасини икки ўйин натижасига кўра етти тўп фарқи билан мағлуб этиб, футбол оламида ўзига хос мактаб яратганини исбот этган эди. Лобановский қўли остида «Олтин тўп»нинг уч совриндори — Олег Блохин, Игорь Беланов ва Андрей Шевченконинг етишиб чиққаниёқ мураббийнинг қандай кучли салоҳиятга эга бўлганидан далолат беради.

Ринус Михелс

Тотал футболнинг отаси сифати тилга олинадиган Ринус Михелс футболга баскетбол ўйини тамойилларини олиб кирди — тўпга эгалик қилинган пайтда барча ҳужумга ўтади, тўп йўқотилгач эса барча ҳимояланади. Мураббийнинг янги фалсафаси туфайли «Аякс» кетма-кет уч маротаба Европада энг кучли деб эътироф этилади. Михелс Голландия терма жамоаси билан 1988 йили Европа чемпионати ғолибига айланди.

Жозе Моуриньо

Замонавий футболнинг энг совриндор мураббийларидан бири. Моуриньо 2 марта УЕФА Чемпионлар Лигасида, 1 марта УЕФА Кубогида ғолиб чиққан. У:

• Португалияда — 2 марта чемпион, 1 марта Кубок соҳиби, 1 марта Суперкубок соҳиби;
• Англияда — 3 марта чемпион, 1 марта Кубок соҳиби, 3 марта Лига кубоги соҳиби, 2 марта Суперкубок соҳиби;
• Италияда — 2 марта чемпион, 1 марта Кубок соҳиби, 1 марта Суперкубок соҳиби;
• Испанияда — 1 марта чемпион, 1 марта Кубок соҳиби, 1 марта Суперкубок соҳиби бўлган.

Бу ютуқлар унинг «Беназир» деб аталишига тўла асос бўла олади.

Арриго Сакки

Арриго Сакки футбол тарихидаги энг яхши мураббийлардан бири саналади. Сакки тўққиз йиллик совринсиз даврдан кейин «Милан»ни чемпионликка бошлаб келди. Бир неча маротаба еврокубокларда ва икки маротаба Қитъалараро кубокда «Милан»ни ғолибга айлантирди. 1994 йилги мундиалда Италия термасини финалгача олиб келган мураббий ҳал қилувчи баҳсда Бразилияга имкониятни бой беради. Лекин у барчага хилма-хил тактикаларга асосланган футболни тақдим эта олган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.