Ўзбекистоннинг биринчи ракеткаси Денис Истомин бугун, 19 январь куни «Катта дубулға» туркумига кирувчи Australian Open–2017 теннис турнирининг иккинчи даврасида жаҳоннинг иккинчи ракеткаси – сербиялик Новак Жоковичга қарши баҳс олиб борди.
Қарийб 5 соат давом этган беллашувда Ўзбекистон вакили 7:6, 5:7, 2:6, 7:6, 6:4 ҳисобида зафар қучиб, ҳақиқий сенсация қайд этди. Ўйиндан кейин 30 ёшли Истомин ўз фикрларини билдириб ўтди, деб ёзади «Sports.uz».
Новакка ачинаман, лекин зўр ўйнаганимдан ўзим ҳам ҳайратландим. Жамоамдагиларга раҳмат айтаман. Учинчи сетда танам увишиб қолди лекин қандай қилиб ғалаба қозонганимни англай олганим йўқ.Денис Истомин, теннисчи
Кутилмаганда мағлубиятга учраган сербиялик теннисчи кучли эканини алоҳида таъкидлаб ўтди.
Дениснинг кучини тан олиш лозим. У ажойиб ўйнади ва ҳаққоний ғалабага эришди. Шубҳасиз, у ўйиннинг асосий жабҳаларида мендан устун эди.Новак Жокович, теннисчи
Бунга қадар ҳар икки спортчи беш бор тўқнаш келган бўлиб, уларнинг барчасида Жоковичнинг қўли баланд келган, Истомин эса фақатгина бир дона сетни ўз фойдасига ҳал қилганди.
Эслатиб ўтамиз, Денис Истомин 17 январь куни ўтказилган илк даврада хорватиялик Иван Додигни 4 сетда – 6:1, 6:4, 3:6, 7:5 мағлуб этганди. Учинчи даврада ўзбекистонлик теннисчи Испания вакили, жаҳоннинг 31-ракеткаси Пабло Каррено Бустага қарши баҳс олиб боради. Бўлажак ўйин натижасидан қатъи назар Истомин 97 минг доллар ишлаб олади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)